Publikuar me : 16.10.2011 Ne :
Kuriozitete - 51 Lexime. Origjina : Gazeta Shekulli
Emirjon Senja
Shpërdorimi i tokës bujqësore në vend është një fenomen që haset kudo në forma të ndryshme. Diku nëpërmjet ndërtimeve pa kriter, erozionit apo hapjes së rrugëve të reja. Gjithandej gjenden shtëpi apo ndërtime të tjera që kanë hedhur themelet mbi tokë të punueshme ose siç thirret në gjuhën popullore “toka e bukës”. Mania për të zbritur në fushë i ka kapur të gjithë. Është e lehtë, ajo që mendohet rëndom është se ndërtimi në “fushë” do më pak shpenzime, je afër rrugëve nacionale dhe më kryesorja, je në tokën tende. Kjo e fundit nuk është kusht që duhet plotësuar domosdoshmërisht, çmenduria e viteve të fundit e ka vërtetuar më se miri këtë.
Nga çdo rreth i Shqipërisë raportohen të dhëna për zënie të tokës bujqësore nga ndërtimit. Ky fenomen është ndalur disi që prej fillimit të procesit të legalizimeve, por njeh hov të madh në përgjatë fushatave zgjedhore. Rasti konkret ishte fushata për zgjedhjet e fundit lokale, ku në çdo cep të vendit mbinë ndërtime të panumërta një pjesë e mirë e tyre mbi tokë bujqësore.
Përgjatë këtyre dhjetë viteve të fundit, në vend janë ndërtuar shumë rrugë të reja që kanë përmirësuar dukshëm infrastrukturën. Por, pjesa më e madhe e tyre janë ndërtuar mbi tokë bujqësore. Rasti i parë ishte ai i autostradës Tiranë-Durrës, për të cilën u sakrifikuan dhe sakrifikohen ende qindra hektarë tokë bujqësore. Rruga u projektua mes përmes fushave, pa marrë parasysh ruajtjen e tokës. Shembull të gjithë ka gjithandej nëpër vend, por më i riu është ai i autostradës Levan-Vlorë. Që në nisje deri në hyrje të qytetit të Vlorë, rruga kalon në pjesën më të madhe nëpër “tokë buke” ose përmes ullishtave.
Alarmi për mbrojtjen e tokës bujqësore është dhënë që në fillim të viteve ’90 nga ish-Presidenti Ramiz Alia dhe është përsëritur thuajse nga të gjithë ministrat e radhës kanë drejtuar Ministrinë e Bujqësisë.
