Çmimi i ujit, me shtrenjte per kryeqytatasit

Publikuar me : 28.11.2011 Ne : Ekonomi dhe Biznes - 71 Lexime. Origjina : Gazeta Shekulli

Kjo, mund të konsiderohet një ndër periudhat kur konsumatorët janë përballur me rritjen më të madhe të çmimeve, rrjedhimisht edhe të kostos së jetesës në Shqipëri. Çmimet e ushqimeve ishin në maksimum kur nisëm vitin, bashkë me to u shtuan edhe cigaret, u shtrenjtuan ilaçet gjithashtu, ndërsa karburantet janë rritur me të paktën 40 deri 50 lekë litri deri më tani. Është aplikuar për rritje të çmimit të energjisë elektrike, ndërsa sëfundmi përballemi me një shtrenjtim tjetër, atë të ujit.

Ujësjellësi i Tiranës, lajmëroi dje se kishte aplikuar për rritjen e çmimit të ujit duke filluar nga viti i ardhshëm. Aplikimi është dërguar pranë Entit Rregullator të Ujit, i cili pasi të marrë në shqyrtim kërkesën dhe treguesit mbi të cilët ajo është hartuar, do të vendosë për masën e rritjes së çmimit të ujit për konsumatorët familjarë, buxhetorë, privatët, etj. Në aplikimin e UKT-së, i bërë publik dje nga drejtori Sahit Dollapi, kërkohet një rritje çmimi për ujin me 22 lekë për metër/kub për konsumatorët familjarë.

Aktualisht, çmimi për këtë kategori është 33 lekë/m³, ndërsa UKT propozon që të bëhet 55 lekë. Rritja është propozuar edhe më e lartë për institucionet buxhetore, të cilat propozohet të paguajnë 150 lekë/m³ nga 110 lekë që është sot. Bizneset nga ana tjetër, pritet të përballen me një shtrenjtim të çmimit të ujit me 30 lekë/m³. Nga 120 lekë m³ që është aktualisht, UKT propozon një çmim deri në 150 lekë/m³ për këtë kategori. Prodhuesit e pijeve apo pishinat ndërkohë do ta blejnë edhe më shtrenjtë ujin. UKT propozon një çmim deri në 200 lekë/ m³ për këto të fundit nga 140 lekë që shitet aktualisht.

Rritja e çmimit të ujit u justifikua nga Dollapi me investimet që po bën UKT-ja dhe ato që do bëhen në muajt në vijim. Kjo deklaratë bëhet tani në stinën e dimrit, por një pjesë e mirë e qytetarëve të Tiranës, në rastin e UKT-së por edhe të mjaft qyteteve të tjera janë vuajtës të mungesës së ujit për ditë dhë javë të tëra në shtëpitë e tyre.

Shumë kryeqytetas dinë se ku t’a gjejnë shpëtimin ditët e nxehta të verës, kur rubineti është tharë për disa ditësh, ai është mali i Dajtit. Një ndër burimet e tij kthehet në vend “pelegrinazhi” gjatë muajve të verës, duke i vizituar nga qindra kryeqytetas sidomos në orët e para të mëngjesit duke mbajtur radhë për të mbudhur ujë. Iu duhet të furnizojnë shtëpinë më ujë para se të shkojnë në punë. “Furnizimi 24 orë me ujë, nuk mund të arrihet pa një buxhet të mjaftueshëm dhe pa të ardhura të qëndrueshme.

Dhe, kurrsesi, nuk mund të arrihet nëse uji, malli që ne prodhojmë, shitet nën kosto, siç ka ndodhur deri më sot. UKT, ka shtuar kapacitetet depozituese te ujit, kemi përmirësuar ndjeshëm rrjetin transmetues dhe të shpërndarjes, duke ndërtuar 33 km lidhje transmetimi dhe rreth 95 km rrjet shpërndarës; kemi rritur orët e furnizimit me ujë në mënyrë të pandërprerë nga 12 orë në 16-18 orë në ditë; janë eleminuar nga harta e zonave problematike, që nuk kishin marrë kurrë ujë, disa qendra të mëdha urbane në kryeqytet, duke i integruar këto zona në regjimin e furnizimit me ujë të Tiranës”, – tha ndër të tjera Dollapi.

Përkundër kësaj, fakt është që sot vuajnë për ujë të njëjta zona që kanë vuajtur edhe dy, tri apo katër vjet më parë. Të tilla janë Komuna e Parisit, pallatet pranë Artistikes Migjeni, Unaza e re, etj. Më keq akoma është zona pranë Liqenit Artificial të Tiranës, ku zona nuk është e lidhur fare me rrjetin e ujësjellësit, ndërsa banorët i janë përshtatur situatës duke hapur një depozitë të madhe, e cila furnizohet në mënyrë periodike me bote uji.

 

Tarifat e ujit të pijshëm

     Është                                      Propozohet

Konsumator familjar:                                        33    lekë/ m³                         55 lekë/ m³

Institucione  buxhetore:                                     110    lekë/ m³3                    150 lekë/ m³

Ente private:                                                         120    lekë/ m³                      150 lekë/ m³

Klientë të veccantë                                              140    lekë/ m³                      200 lekë/ m³

(Prodhim pije alkoolike, freskuese, Pishina)

Furra buke                                                            95    lekë/ m³                         95 lekë/ m³

HEC Lanabregas                                                 5    lekë/ m³

Tarifë mujore fikse                                             100 lekë/ klient