‘Miniera e Bulqizes drejtohet nga shoku i Rulit e Kulicaj’

Publikuar me : 14.09.2011 Ne : Politike - 77 Lexime. Origjina : Gazeta Shekulli

Luis Tanushi

Partia Socialiste akuzoi ministrin Genc Ruli për lidhje interesash me kompaninë ACR të minierës së Bulqizës. Gjatë interpelancës me ministrin aktual të Ekonomisë Naço, nënkryetari i grupit parlamentar socialist Sajmir Tahiri theksoi se ACR është kompani e krijuar nga njerëzit e ish-ministrit Genc Ruli dhe drejtues lokalë në Bulqizë që kanë lidhje me PD-në.

“Si fillim marrëveshja koncensionare është lidhur mes shtetit dhe DARFO-s, por pastaj DARFO u zhduk pa shpallur faliment, duke marrë edhe arkëtimin e milionave që kishte fituar në atë moment. Me ndryshim emri u fut në lojë një tjetër kompani ACR. Në 2007 kur fitoi të drejtën për të shfrytëzuar Bulqizën, kishte 7 vjet që mbijetonte në treg. E themeluar në vitin 2000 përfaqësuesi t e saj kanë qenë Kristo Rodi dhe Eduard Belegu. Rodi, shok klase dhe mik i ngushtë me Genc Rulin. Në kohën kur ACR zëvendësoi DARFO-n ishte ministër Ruli. Duket se me miratimin e ministrit të asaj kohe shoku i Rulit, të drejtën për të shfrytëzuar minierën e kaloi nga DARFO te ACR”,- tha Tahiri.

Kreu i PS-së së Tiranës përmendi edhe një rast ku ministri Ruli ka ndihmuar ACR-në që të mos paguajë penalitetet sipas kontratës. “Kompania ACR i dërgon një shkresë METE, ku i kërkohet ministrit ti falen e ti shtyhen penalitetet prej më shumë se 2 milion euro për shkak se kompania nuk kishte realizuar investimin. Shkresën e merr Z. Kristo Rodi, që siç e thash, babai themelues i vetë ACR, tashmë drejtori më i rëndësishëm në METE. Kërkesa e ACR mbërrin në dorën e Ministrit në Dt 8 Korrik 2009 dhe menjëherë në dt 9 Korrik, vetëm 1 ditë më pas, Ministri Genc Ruli firmos marrëveshjen që kishte kërkuar vetë kompania, pra faljen dhe shtyrjen e penaliteteve të parashikuara në marrëveshjen koncesionare. Komanda e korrupsionit të dhunshëm, ai që mbahet me gangsterë e polici, pushtet e ryshfete, kalon nga Roland Keta, kryetari i Bashkisë Bulqizë, njëkohësisht dhe Kryetari i PD Bulqizë. Vëllai i tij, Eduard Keta ka 4 licenca, ato në Zonën D, të cilësuara të paligjshme. Deputetët e PD në Bulqizë kanë nga ca licenca secili, të gjitha në emër të të afërmve dhe miqve në Bulqizë”,- tha Tahiri.

Sipas deputetit socialist, një person tepër i rëndësishëm në rrjetin e kontrabandës është zv.drejtori i përgjithshëm i policisë, ish-truproja personale e Berishës, Agron Kuliçaj. “Kontrabanda shkon më lart, tek “të paprekshmit” e familjes Berisha. Emri i Agron Kuliçajt lidhet drejtpërdrejtë me kontrabandën e mineraleve. Maunet e kontrabandës ngarkohen dhe nisen nga Bulqiza për në Durrës. Rrugët e transportit janë në mbikëqyrjen e strukturave shtetërore, që mesa duket kryesohet nga Agron Kuliçaj. Ngarkesa kontrabandë del nga porti i Durrësit, me emrat e disa kompanive fantazmë, që sipas të dhënave, shumica e tyre të drejtuara nga një shtetas me mbiemrin Nasufi. Kjo kontrabandë përfundon si destinacion final në Kinë, në kujdesen personale të Z. Kristo Rodi, i njëjti që krijoi ACR, që i dha ACR koncesionin e Darfo, i njëjti që ishte drejtor i METE, i njëjti, shoku më i ngushtë i Genc Rulit”,- tha Tahiri.

Ndërsa ministri aktual Naço mbrojti institucionin që ai drejton duke deklaruar se pas grevës në Bulqizë janë edhe interesat e krerëve sindikalistë që bëjnë biznese pas krahëve të punëtorëve. “Pasi kam ndjekur nga afër dinamikën e kësaj greve kam krijuar bindjen e plotë se drejtuesit e grevës po spekulojnë me interesat e ligjshme të minatorëve dhe po bëjnë të gjitha përpjekjet për të larguar kompaninë ACR, me synimin e qartë për t’u kthyer nga sindikalistë në biznesmenë, qoftë edhe me financimin e disa grupeve të biznesit lokal që mbajnë peng zgjidhjen e kësaj situate deri në falimentimin e kësaj kompanie dhe largimin e saj nga Shqipëria”, tha Naço. Gjithsesi ministri pranoi se marrëveshjet nënkontraktore të ACR-së me firmat e tjera janë të jashtëligjshme. “Një arsye e rëndësishme e pezullimit të aktivitetit minerar në zonën D, ishte fakti se ACR në 2010 ka lidhur disa kontrata nënkontraktore me subjekte të tjerë që operojnë në këtë fushë pa miratimin e Ministrisë, që është në kundërshtim të plotë më kontratën koncensionare”, u shpreh Naço.

 

 

Policia: Kuliçaj nuk bën kontrabandë

Policia e Shtetit ka kundërshtuar dje akuzat e bëra në Parlament nga deputeti Sajmir Tahiri për lidhje me kontrabandën e mineraleve të Zv. drejtorit të Policisë së Shtetit Agron Kuliçaj. “Policia e Shtetit i konsideron këto akuza presione të papranueshme kundër punës së Policisë së Shtetit në luftë kundër krimit të organizuar dhe korrupsionit. Zv.Drejtori i Përgjithshëm Z.Agron Kuliçaj ka depozituar sot pranë Gjykatës së Shkallës së Parë Tiranë një padi civile për shpifje për shkak të detyrës kundër shtetasit Sajmir Tahiri, deputet i Kuvendit të Shqipërisë. Zv.Drejtori i Përgjithshëm Z.Agron Kuliçaj drejton me sukses Departamentin Kundër Krimit të Organizuar dhe Krimeve të Rënda, sukses i cili është i njohur dhe vlerësuar nga organizata të rëndësishme partnere që asistojnë dhe bashkëpunojnë me Policinë e Shtetit”,- thuhet në njoftimin e policisë.