“Nxehet” merkatoja e dimrit

Publikuar me : 05.01.2012 Ne : Sport - 62 Lexime. Origjina : Gazeta Shekulli

Nga Xhek Preçetaj

Talenti kosovar nga Gjilani, Granit Xhaka, i cili luan për Bazelin është nën shenjestrën e Mançester Junajtedit. Ekipi anglez tashmë i ka humbur shpresat për të marrë Shnajderin nga Interi dhe për këtë arsye ka hedhur sytë nga talenti kosovar, por duhet të mundë konkurrencën e Hamburgut.

Duke qëndruar në Angli tek Çelsi, transferimi i Kahillit tek klubi londinez është ndalur për shkak të kërkesës së lojtarit, i cili kërkon 7.5 milionë euro në sezon ndërkohë që Çelsi i ofron maksimumi 4.2 milion në sezon. Ndërkohë, Tevez është një temë e “nxehtë” për Milanin, kjo pasi megjithëse ekipet si Juventus dhe PSG hoqën dorë nga ky lojtar, tashmë rishfaqet një tjetër ekip i interesuar dhe ai është Inter. Kushërinjtë milanez kanë ofruar për argjentinasin 25 milionë euro. Por Interi nën objektivin e tij ka edhe mesfushorin serb nga Mitrovica, Millosh Krasiçin, i cili luan për Juventusin. Interi kërkon ta marrë në formën e huazimit por Juventusi dëshiron pagesën kesh prej 15 milionë eurosh.

Ndërkohë në krahun tjetër kushërinjtë e Milanit po mendojnë për një shkëmbim Taivo-Maksuell me Barcelonën. Megjithatë, skuadra më aktive në merkato në Itali mbetet Juventusi, e cila dëshiron të forcojë skuadrën për pjesën e dytë të sezonit. Ajo dy ditë më parë zyrtarizoi edhe blerjen e sulmuesit Borielo nga Roma. Ndërkohë, tashmë po mundohet të marrë shërbimin e mbrojtësit uruguajan Kaseres nga Sevilja. Për Kaseresin do të ishte një rikthim tek Juventusi, pas përvojës që pati 3 vite më parë. Nëse nuk arrihet tek uruguajani, Juventusi ka gati marrëveshjen për të sjellë në Torino mbrojtësin Boketi.

Ndërkohë, për mesfushën dy janë pistat: ajo e kilenit Pizarro të Romës dhe Guranit të Portos. Porto për mefushorin kërkon 13 milionë euro ndërsa Juventusi ofron 11 milionë euro.  Fjorentina po mendon për të zëvendësuar Gilardinon dhe zëvendësuesi mendohet të jetë Amauri nga Juventusi, ndërkohë Luka Toni është shumë pranë kalimit tek Kalieri. Roma gjithashtu po mendon për të marrë Luganon nga PSG. Ekipi parisien ka ndërmend të shpenzojë 63 milionë euro për Paton dhe Kakanë për t’i vënë në dispozicion të Ançelotit.