“Princi i Vogel” me nje teknike te re kukullash

Publikuar me : 02.07.2011 Ne : Kulture - 204 Lexime. Origjina : Gazeta Shekulli

Po shfaqet nga mbrëmë në skenën e re të Teatrit Kombëtar për Fëmijë “Princi i Vogël” i frymëzuar nga vepra e njohur e Antoine de Saint Exupery. Regjisor, profesori bullgar Bonjo Lungov që prej disa ditësh po punon në Tiranë me artistët shqiptarë për një shfaqje kushtuar moshave “2 deri 89 vjeç”, siç u shpreh për mediat. Lungov foli për përdorimin e një teknike të re për teatrin shqiptar të kukullave. Kjo teknikë e sjellë nga Lungov, me një eksperiencë të gjatë në skena të Evropës, konsiston në ndriçimin nëpërmjet dritës vetëm të kukullës, ndërsa tre aktorët që e lëvizin atë, mbeten të padukshëm. Lungov theksoi dje se në këtë teatër nuk është punuar kurrë me sistemin Java, por as me kukulla mimike apo të improvizuara. “Në këtë rast, ndërthurja e këtyre tri sistemeve të kukullave është diçka e re dhe do të jetë shumë interesante edhe për publikun që e sheh. Janë tre aktorë që punojnë me një kukull, që do të thotë se të tre duhet të jenë në sinkron të plotë dhe kjo nuk është e lehtë.” Kukullat, skenografia, multimedial, janë realizuar në Bullgari dhe i janë përshtatur skenës së re të Teatrit Kombëtar të Kukullave që ka për t’i habitur të gjithë ata që e njohin këtë vend me fytyrën e re që ka marrë. Por Lungov theksoi se mbetet akoma shumë për të bërë për të investuar më shumë në skenë dhe sidomos në teknikë.

“Princi i vogël” realizohet falë marrëveshjes që ka nënshkruar Qendra Kombëtare e Fëmijëve nën drejtimin e Flamur Shehut, me Akademinë NATFIZ, ku mëson Bonjo Lungov. Në vitin 2009 ishte realizuar “Princesha dhe Dragoi” prej bashkëpunimit midis Teatrit të Kukullave të Bullgarisë dhe Teatrit Kombëtar për Fëmijë, të Tiranës.