Publikuar me : 06.12.2011 Ne :
Kuriozitete - 67 Lexime. Origjina : Gazeta Shekulli
Në një intervistë për portalin “Tema Online”, ish-ministri i Ekonomisë Dritan Prifti, thotë se viti që po vjen do të jetë shumë i vështirë nga pikëpamja ekonomike: “Unë parashikoj që fundi i 2012-s do të jetë shumë më i keq, se fundi 2011-s. Shoh recesion të pashmangshëm”, – thotë mes të tjerash deputeti Prifti.
Si e gjykoni punën që bën sot qeveria?
Ne s’kemi qeveri. Ajo nuk ndjehet për mirë askund. Shqipërinë e mbajnë vetëm bizneset private, të cilat punojnë me shumë vështirësi, mes dhunës e korrupsionit qeveritar, për të mbajtur ekonominë e këtij vendi në këmbë, dhe për të furnizuar këtë popull me gjërat me jetike. Qeveria vetëm pengon. Ministrat vonojnë punët, krijojnë pengesa artificiale për biznesin, me qëllim zhvatjen prej tyre të bakshisheve të majme. E them sinqerisht që nuk kemi qeveri. Ne mbijetojmë për shkak të sistemit kapitalist dhe shtresës së sipërmarrësve, që punojnë për të mbijetuar ky vend. Duhet t’ua dimë për nder vetëm shtresës së biznesit dhe shqiptarëve të thjeshtë që paguajnë taksa dhe punojnë.
A është e përgatitur Shqipëria për të përballuar një krizë të monedhës evropiane, apo ndonjë falimentim të Greqisë apo Italisë?
Shqipëria nuk është e përgatitur për asgjë. Kam parë draft-buxhetin e vitit 2012. S’ka asnjë mase antikrize. S’ka asnjë fond për të ndihmuar bankat, nëse kanë dyndje nga depozituesit për të tërhequr depozitat e tyre. Nëse bie monedha Euro, bie Evropa. Kjo do të sjellë një frikë dhe krize pan-evropiane, jo vetëm te BE. Para një muaji Kancelaria Merkel në kongresin e partisë se saj CDU deklaroi se “Paqja nuk mund të merret si e mirëqenë”, d.m.th., se rreziqet janë të mëdha, deri tek lufta. Kurse pak ditë më parë Ministri i Financave të Francës foli më hapur, duke thënë se kjo situatë financiare në Evropë mund të sjellë luftëra. Ne Shqipëri ne nuk jemi gati për të përballuar asgjë.
Ju mendoni se bankat shqiptare janë të rrezikuara?
Zyrtarisht FMN thotë se kreditë e këqija në Shqipëri, ato që nuk paguhen, kanë shkuar 18 perqind të portofolit të bankave. E vërteta është që ato janë rreth 30 perqind, sepse deklarimet që bëhen në Bankën Qendrore janë me rezerva, dhe fshehin të vërtetën. Kjo është shifra më e lartë në Evropë për kreditë e këqija. Edhe 18 perqind është shumë e lartë. Unë do të isha i alarmuar për gjendjen e bankave në Shqipëri. Këtu askush nuk flet për këtë situatë. Qeveria s’ka asnjë fond në dispozicion për bankat, nëse ndodh një mungesë likuiditeti.
Ju mendoni përkeqësim të gjendjes ekonomike në vend në 2012-n?
Viti tjetër do të jetë shumë më keq. Do të bjerë kreditimi i ekonomisë, do të bjerë konsumi, do të rritet papunësia dhe si rrjedhojë do të rritet varfëria. Unë parashikoj që fundi i 2012-s do të jetë shumë më i keq, se fundi 2011-s. Qeveria nuk po merr asnjë masë për të stimuluar prodhimin, për të rritur punësimin. Ministrat numërojnë ditët në pushtet dhe presin si hiena të vjedhin diçka më shumë çdo ditë. Shoh një paralizë idesh për të qeverisur. Shoh recesion të pashmangshëm.
