Publikuar me : 31.10.2011 Ne :
Kronike - 85 Lexime. Origjina : Gazeta Shekulli
Policia e Tiranës ka arrestuar katër persona dhe ka bllokuar 120 kilogramë hashash në një operacion të koduar me emrin “Hallouin”. Droga vinte nga Lazarati dhe do shitej në Tiranë ndërsa tëarrestuarit janë Shkëlzen Kol Hajdari, 32 vjeç, Aleksander Zef Kola (Dedukaj), 32 vjeç, Eqerem Kapllan Hoxha, 56 vjeç dhe Maliq Xhemal Memo, 54 vjeç.
Arrestimi i tyre është kryer teksa po hynin në kryeqytet nga rruga e vjetër Tiranë- Durrës. Policia e Tiranës kishte marrë informacione në rrugë operative për mundësinë e transportimit të një sasie të madhe hashashi. Të dhënat zyrtare të policisë tregojnë se hashashi është blerë në Lazarat nga Shkëlzen Hajdari dhe Aleksandër Kola. Ajo është vendosur në makinën e shtetasit Maliq Memo dhe përpara tre ose katër ditësh është nisur drejt Durrësit ku është fshehur në banesën e shtetasit Eqerem Hoxha.
Policia kishte dijeni se Maliq Memo merrej me shpërndarje lënde narkotike dhe e kishte në ruajtje. Pasditen se së shtunës, katër të arrestuarit janë nisur nga Durrësi për në Tiranë me dy makina. Memo dhe Hoxha ndodheshin në një veturë ndërsa Hajdari dhe Kola me një fuoristradë. Policia i kishte ndjekur nga pas me makina private ndërsa në hyrje të Tiranës ishte ngritur një postbllok në një vend disi të fshehur. Në afërsi të fshatit Pezë Helmës policia ka dalë përpara makinave dhe i ka kërkuar që të ndalojë. Vetura e vogël ka devijuar nga rruga edhe është nisur drejt lapidarit të Pezë, pranë të cilit është bllokuar nga policia. Makina e dytë, tip Mitsubishi Pajero është bllokuar në vend. Në të ndodheshin 120 kilogramë hashash.
“Bazuar në informacionet e marra në rrugë operative të Seksioni Kundër Narkotikëve në Policinë e Kryeqytetit u arrit kapja e tyre në afërsi të fshatit Pezë Helmës në Tiranë, përgjatë momenteve të transportimit të lëndës narkotike prej 120 kg, me dy automjete, tip Mitsubishi Pajero. Nga kontrolli i ushtruar në automjet u gjendën e 19 thasë të mbushur me bimë të dyshuar narkotike e llojit Cannabis Sattiva, me peshë 120 kg. Gjithashtu gjatë kontrollit fizik të shtetasit Shkëlzen Hajdari, ju gjet dhe sekuestrua në cilësinë e provës materiale një armë zjarri pistoletë Zastava model- 54, me nje karikator dhe 9 fishekë”,- thanë dje burimet zyrtare të policisë së Tiranës. Sipas tyre, droga ishte blerë në Lazarat për rreth 50 mijë euro dhe pas shitjes në Tiranë të arrestuarit do të fitonin rreth 100 mijë euro.
Hetuesit shpjeguan se organizatorë të këtij trafiku dyshohet se janë Shkëlzen Hajdari dhe Aleksandër Kola. Të dy këta persona kanë qenë të dënuar në Greqi për trafik lëndësh narkotike dhe pasi kanë vuajtur dënimet janë rikthyer në Shqipëri. Burimet pohuan se ka edhe persona të tjerë në hetim, por emrat e tyre nuk mund të bëhen ende publikë.
Të sekuestruara
Sasia e bimës se dyshuar narkotike e llojit Cannabis Sattiva, me peshës 120 kg
Një pistoletë (Zastava), me një karikator dhe nëntë fishekë, model 54
Dy automjete
Një shumë parash të cilat janë përfituar nga kjo veprimtari
Shkelzen Kol Hajdari, 32 vjec, banues në Qafzotaj Durrës, i dënuar në shtetin Grek për trafik lëndësh narkotike,
Aleksander Zef Kola (Dedukaj), 32 vjec, banues në Dushnez Tropojë, i dënuar më parë në shtetin Grek për trafik lëndesh narkotike,
Eqerem Kapllan Hoxha, 56 vjec, banues në Qafzotaj Durrës,
Maliq Xhemal Memo, 54 vjec, banues në Shijak Durrës,
