Tirana e Vllaznia, perballje ne javen e pare

Rruga e gjate drejt kampionatit 2008-‘09 ne Kategorine Superiore ka nisur nga Pallati i Kultures, ku gjate mesdites se djeshme u hodh shorti i sezonit te ri. Pas fjales hapese te shefit te marredhenieve me median ne FSHF, Tritan Kokona, ceremonine e pershendeti presidenti i FSHF-se, Armand Duka. Ne fjalen e tij, kreu i institucionit qe drejton futbollin ne vend nuk harroi te theksonte nivelin e larte te kategorise elitare ne sezonin e kaluar, qe dhuroi emocione deri ne javet e fundit. "Me nje pune ndryshe ne Federaten Shqiptare te Futbollit dhe me nje organizim perfekt, duke pasur parasysh edhe eksperiencen e viteve te shkuara, une jam i bindur se dhe te gjithe ne besojme se sezoni i ri do te dhuroje spektakel per futbolldashesit shqiptare, ku padyshim urojme qe te fitoje me i miri. Uroj futbollistet e trajneret dhe i falenderoj ata per kontributin e tyre ne zhvillimin e futbollit shqiptar", tha Duka. Ne shortin e pare te ketij lloji te organizuar nga FSHF goglat jane terhequr nga moderatorja Anjeza Maja, e cila shoqerohej nga dy figura te shquara te futbollit shqiptar: Fatmir Frasheri, ish-futbollist, trajner dhe president i Tiranes dhe ish-lojtar i Vllaznise dhe Kombetares, Hysen Zmijani.

Qe prej shortit u zbulua se ashtu si ne edicionin e kaluar, Tirana e Dinamo do t‘i luajne ndeshjet ne stadiumin "Selman Stermasi", e per keto dy skuadra u caktuan me short te veçante numrat 1 e 12, ku per blute u terhoq gogla me numrin 1, ndersa per bardheblute mbeti numri 12. Nderkohe, Partizani do vazhdoje t‘i zhvilloje ndeshjet ne stadiumin "Qemal Stafa". Ne baze te skemes se percaktuar me pare, java e pare e Superiores, qe do te luhet me 24 gusht, do te startoje me nje ndeshje te madhe, ku Vllaznia pret Tiranen ne Shkoder. Fillimi i veshtire i bardhebluve vazhdon ne javen e trete, me derbin perballe Partizanit, ndersa ne javen e shtate ata luajne me Dinamon kampione ne fuqi. Pas sfides me Tiranen, dinamovitet nga ana e tyre luajne me Partizanin ne javen e 8-te. Ne fazen e dyte, Partizani perballet me Tiranen ne javen e 14-te dhe me Dinamon ne javen e 19-te. Dinamo pret Tiranen ne javen e 18-te.