Apeli liron tre anetare te bandes se Lushnjes

Publikuar me : 21.09.2011 Ne : Kronike - 88 Lexime. Origjina : Gazeta Shekulli

Apeli i Krimeve të Rënda i ka dhënë dje lirinë tre anëtarëve të bandës së Lushnjes. Një prej tyre ka marrë pafajësi ndërsa dy të tjerët do të lirohen për shkak të përfundimit të dënimit pas uljes që i ka bërë Apeli. Afrim Hoxha ishte dënuar me 18 vite burg, por dje e pa veten të pafajshëm.

Pas rishqyrtimit të çështjes, Gjykata e Apelit për Krimet e Rënda vendosi të lirojë nga burgu duke shpallur të pafajshëm Afrim Hoxhën, ndërsa ka ulur dënimin nga 16 në 10 vjet për të akuzuarin tjetër Rexhep Gina. Por, sipas avokatëve të tij mbrojtës, Gina duhet të lerë qelinë pasi i kanë përfunduar afatet e burgimit. Duke llogaritur kohën në paraburgim dhe atë burg, Gina duhet të fitojë lirinë.

Ndërkohe i akuzuari tjetër Arjan Aliço duket se është në prag të lirimit. Ai është dënuar dje nga Gjykata e Apelit për Krimet e Rëndë me pesë vite burg. Por, sipas avokatëve, koha e kaluar prej tij në burg dhe paraburgim është më e madhe dhe për pasojë duhet të lirohet. Pasi të përfundojnë llogaritjet e ditëve të kaluara në burg të akuzuarit do të kërkojnë dëmshpërblim për ditët tepër.

Gjykata e Apelit ndërkaq la në fuqi vendimin që Arben Boriçi dhe Ilir Stërgu të dënohen me burg të përjetshëm. Anëtarë të tjerë të bandës famëkeqe të Lushnjës, Erjon Cici do të vijojë të vuajë dënimin me 25 vite burg dhe Jorgo Muzaka u dënua dje me gjashtë vjet burg.

Të akuzuarit si anëtarë të “Bandës së Lushnjes”, akuzohen për disa vepra të rënda penale, si disa vrasje të kryera në kuadër të organizatës kriminale, disa vjet me parë, në vendin tonë.  Ndërsa, në proces gjykimi në Gjykatën e Apelit për Krimet e Rënda është edhe kreu i “Bandës së Lushnjes”, Aldo Bare. Prokuroria nuk ishte dakord me vendimet e dhëna dje nga Gjykata e Apelit dhe deklaroi menjëherë pas seancës se do të bëjë rekurs në Gjykatën e Lartë. flamur vezaj