Publikuar me : 13.12.2011 Ne :
Politike - 86 Lexime. Origjina : Gazeta Shekulli
Denis Dedej
Në një seancë maratonë, komisioni ad-hoc socialist që do të përzgjedhë kandidaturën e Avokatit të Popullit ka dëgjuar dje 12 pretendentët për këtë pozicion. Ashtu siç ishte paralajmëruar, dëgjesa publike është zhvilluar e hapur për mediat në një prej ambienteve të një universiteti privat në Tiranë dhe secili prej kandidatëve ka shpalosur për 25 minuta vizionin e tij për pozicionin e Avokatit të Popullit. Në këtë kohë përfshihej 15 minuta fjalim i lirë dhe 10 minuta u shfrytëzua nga anëtarët e komisionit të përzgjedhjes për të drejtuar pyetje të ndryshme që lidhen me funksionimin dhe veprimtarinë e drejtuesit të institucionit. Në orën 9:30 të mëngjesit të djeshëm të gjithë anëtarët ishin të pranishëm në një sallë të përbashkët për të marrë pjesë në hedhjen e shortit që përcaktoi radhën se si do të shpalosnin vizionin e tyre. Gjysmë ore më vonë nisi dëgjesa publike me kandidatin Kesnofon Krisafi dhe përfundoi me Sokol Hazizajn.
Në fund të kësaj dëgjese, anëtarja e komisionit përzgjedhës, Eglantina Gjermeni, vlerësoi prezantimet e kandidatëve dhe sqaroi hapat që do të ndiqen më tej. “Kjo dëgjesë publike të jemi të sinqertë nuk na e lehtësoi punën, përkundrazi përzgjedhja e Avokatit të Popullit bëhet vërtet më e vështirë pas dëgjimit të çdo njërit të interesuarve që përgjithësisht ishin mbresëlënëse. Komisioni do të përgatisë një raport të hollësishëm, të plotë, për 12 kandidaturat dhe do të shpallë kandidaturën fituese ditën e enjte datë 15 dhjetor në orën 15:30”, – sqaroi Gjermeni, njëherësh anëtarë e Kryesisë dhe deputete e PS-së.
Ajo garantoi në emër të komisionit që do të lexojnë me vëmendje dhe do të diskutojnë lidhur me çdo prezantim që ju dorëzua këtij komisioni. Përfaqësuesja e komisionit ad-hoc garantoi gjithashtu “qoftë kandidatët, qoftë opinionin publik në vazhdimësinë e transparencës në përzgjedhjen e kandidaturës më të mirë për Avokatin e Popullit”. Secili prej anëtarëve mori një kopje të prezantimeve të kandidatëve.
Gjatë gjithë procesit të dëgjimit publik, ishte i pranishëm dhe kryetari i Partisë Socialiste, Edi Rama, i cili në asnjë moment nuk është larguar nga salla. Në një prononcim për mediat, kryesocialisti vlerësoi se procesi flet vetë për transparencën dhe cilësinë e tij. “Unë në rolin e dëgjuesit bashkë me të tjerët këtu jam i mbresuar nga serioziteti i atyre që kanë paraqitur deri tani vizonin e tyre për Avokatin e Popullit. Dhe u qaj hallin anëtarëve të komisionit sepse do të kenë një zgjedhje të vështirë për të bërë, pasi kandidaturat janë profile të ndryshme, por në përmbajtje kanë profesionalizëm, kanë seriozitet dhe japin shenja shumë domethënëse që janë në lartësinë e sfidës”, – deklaroi Rama. Gjithashtu, në këtë dëgjesë publike ishin të pranishëm dhe deputetë të grupit parlamentar socialist, ambasadori i BE, Etore Sekui, ambasadori i Danimarkës, Karsten Ankjaer Jensen, përfaqësues nga OSBE, ambasada e britanike dhe ajo italiane. Komisioni përzgjedhës do të zhvillojë disa mbledhje të tjera përpara nxjerrjes së kandidatit përfundimtar.
