BE Dialog ose harroni anetaresimin ne Europe

Publikuar me : 22.07.2011 Ne : Politike - 125 Lexime. Origjina : Gazeta Shekulli

Shqipëria duket se e ka humbur sërish “trenin” e Bashkimit Europian, pasi është ende larg plotësimit të kritereve. Në nisje të gjashtëmujorit të presidencës polake, mesazhi që i është dërguar Shqipërisë është i qartë: Duam të ju anëtarësojmë, por ju nuk doni të plotësoni kushtet e vendosura. Dhe një ndër kushtet kryesore është dialogu.

Gjatë konferencës së djeshme, ambasadori i Bashkimit Europian, Ettore Sequi dhe ambasadorja polake, Irena Tatarzynska u shprehën se progresi për integrimin europian kushtëzohet direkt nga dialogu midis partive politike. “Unë shoh dhe kam parë në muajt e kaluar polarizim dhe mosbesim. Unë dëshiroj të shoh që besimi të shkojë në rritje dhe polarizimi të vejë në ulje. Kjo për arsye se unë besoj se integrimi është një objektiv kombëtar për Shqipërinë. BE dhe KE e kanë treguar tepër qartë se janë të gatshëm të vazhdojnë të ndihmojnë këtë proces, dhe ne kemi besim që të gjitha palët duhet të luajnë rolin e tyre që të kemi progres dhe ecuri për këtë çështje”, tha ambasadori Sequi.

Në të njëjtën vijë ishte edhe ambasadorja polake, Irena Tatarzynska vendi i së cilës sapo mori presidencës e radhës të BE-së. Ambasadorja Tatarzynska u shpreh se zgjerimi i komunitetit europian është synimi kryesor i presidencës polake, por vendet që aspirojnë duhet të plotësojnë më parë kushtet. “Zgjerimi është synimi ynë strategjik. Po ashtu unë fola edhe për parimin e asaj që quhet procesi i kushtëzimit, pra kushtet që vihen dhe që ka të bëjë me cilësinë e zgjerimit. Do të thosha që ne kemi të bëjmë me kushtet që janë të njëjta për të gjitha vendet.

Nuk mund të japim një datë, por varet nga plotësimi i kushteve”,- tha ambasadorja polake. Nga ana tjetër ambasadori i BE-së në Tiranë shmangu pyetjen lidhur me letrën që kreu i opozitës Rama i ka dërguar Komisionerit për Zgjerim Fyle, ku i kërkon adresimin e përgjegjësive për atë që ndodhi në zgjedhjet e 8 majit. “Unë nuk jam mësues, unë s’jam pedagog . Unë nuk është se jap thjesht nota. Ajo që dua të shoh është që të kemi një proces integrimi në BE dhe zbatimin e 12 prioriteteve kyçe. Një proces, i cili të ecë në mënyrë të efektshme dhe të shpejtë. Për çdo gjë tjetër mund ti referoheni deklaratave të mëparshme, asaj të datës 20 qershor dhe të asaj të dy ditëve më parë”, the Sequi.

L.Tanushi