Berisha Nuk kemi nevoje per opoziten. Rama Nuk shpetohet fshati me shirita

Publikuar me : 29.10.2011 Ne : Politike - 99 Lexime. Origjina : Gazeta Shekulli



Pas deklaratës së Kryeministrit Berisha gjatë një përurimi në Berat se nuk do të hiqej TVSH-ja e produkteve ushqimore, reagoi Kryetari i Partisë Socialiste Edi Rama në faqen e tij të  zyrtare të Twitter: “Sali, ti gënjen, do të heqim taksën e bukës, qumështit vezëve, ilaçeve, dhe jo TVSH-në e prodhimeve të Tokës”.

Kreu i opozitës theksoi se fshatit duhet t’i hiqet TVSH- ja e imputeve bujqësore. “Nuk mund të shpëtosh fshatin me shirita inaugurimesh”, theksoi Rama në kundërpërgjigjen e vet.

 

*****

Kryeministri Berisha u shpreh sot në Berat se nuk pranon propozimin e Partisë Socialiste për heqjen e TVSH-së për produktet ushqimore. Duke folur para banorëve të komunës Otllak, Berisha ka bërë akuzat e radhës ndaj opozitës dhe kreut të saj se “me heqjen e TVSH-së së ushqimeve kërkojnë të rrisin të ardhurat e tyre”.

“Krerët e PS-së duan heqjen e TVSH-së, por nuk mund të ketë heqje të saj. Ata e bëjnë këtë kërkesë për të rritur ardhurat e tyre. Ne nuk mund të lejojmë që prodhimet tuaja të mbeten në fushë, pasi fatmirësisht ky nuk është një ligj që kërkon 3/5”, u shpreh Berisha.

Duke u ndalur në këtë pikë, kreu i qeverisë përsëriti akuzat ndaj opozitës  për bllokim të procesit të integrimit duke mos miratuar ligjet që kërkojnë shumicë në cilësuar.

“PS kërkon që të përdorë pushtetin për të mos miratuar ligjet me 3/5, por këto janë vetëm 5 për qind e ligjeve. Ata nuk po bëjnë gjë tjetër veçse po shtyjnë procesin. Në zgjedhjet e fundit, Rama mori 141 mijë vota më pak.  Ai shkon nga disfata në disfatë”, tha Berisha.

Kreu i qeverisë ishte në Berat për përurimin e një rruge.