Boterori, te gjithe syte tek Erkandi

Publikuar me : 11.11.2011 Ne : Sport - 37 Lexime. Origjina : Gazeta Shekulli

 Endi Tufa

Në Botërorin e peshëngritjes në Paris garuan dje dhe dy sportistët Briken Calja e Daniel Godelli, ndërsa të dy kanë dështuar në paraqitjet e tyre. Në dygarësh Calja ngriti 312 kg duke u renditur në mesin e klasifikimit në baterinë B për peshën 69 kg, ndërkohë që Godelli ngriti në dygarësh 311 kg duke qëndruar pranë shokut të skuadrës në klasifikim. Ky rezultat sipas trajnerëve ishte i pritur deri në njëfarë mase, pasi këta sportistë që kur janë nisur nga Tirana kanë qenë të dëmtuar dhe nuk ishin në maksimumin e tyre. Ndërkohë, sot pritet shpresa e vetme e mbetur për kualifikim.

Gjithçka me sa duket do të jetë në duart e Erkand Qerimajt dhe Hysen Pulakut, dy sportistët të cilët marrin pjesë në garën 77 kg në baterinë A. Pas garës së tyre do të mësojmë përfundimisht se sa sportistë do të kemi mundësi të çojmë nga sporti i peshëngritjes në Olimpiadën “Londër 2012”, gjithsesi në kuotën e pesë sportistëve jemi në këtë moment, por a do të mund të konfirmojmë këta a më shumë gjithçka varet nga rezultati i tyre. Ndërkohë, Romela Begaj peshëngritësja shqiptare e cila dy ditë më parë ngriti 213 kg në dygarësh në baterinë B, ndërkohë që falë surprizave në baterinë A në përfundim të garës arriti të marrë medaljen e bronztë në stilin e shkëputjes.

Ky sukses i peshëngritëses shqiptare nuk ka kaluar pa u vënë re e pa u përmendur edhe nga organizatorët e këtij kampionati botërorë të Parisit. Një ditë pas përfundimit të këtyre garave, një koment i Federatës Botërore të Peshëngritjes vlerëson dhe veçon garën e Romela Begajt duke e cilësuar gjithashtu si një rezultat surprizë. Ka qenë një paraqitje jo e mirë e pretendentëve kryesore për medalje në baterinë A gjë që i hapi rrugën sportistes sonë e cila ka arritur të sigurojë dy “bileta” kualifikuese për Lojërat Olimpike “Londër 2012”.