Dashamir Peza, perballe Berishes ne Gjykaten e Larte

Publikuar me : 26.11.2011 Ne : Kronike - 36 Lexime. Origjina : Gazeta Shekulli

Flamur Vezaj

TIRANË- Deputeti socialist Dashamir Peza dhe e shoqja e tij, Entela, do të përballen në Gjykatën e Lartë me kryeministrin Berisha, të cilin e kanë akuzuar për shpifje. Edhe pse padia është bërë pothuajse dy vjet më parë, vetëm tani Gjykata e Lartë ka hedhur shortin për të zgjedhur gjyqtarët që do merren me çështjen.

“Zoti Rama, cili është ai burrë i cili ngrihet nga shtrati i së shoqes në kullën e Myslym Pezës dhe shkon te shtrati i Dashit dhe të deshve dhe e detyron të largohet natën e lemerisur”. Kjo deklaratë, e dal nga goja e kryeministrit Sali Berisha më 26 Nëntor 2009 nga foltorja e Parlamentit, e ka detyruar deputetin e Partisë Socialiste, Dashamir Peza dhe bashkëshorten e tij Entela Peza, ta padisin kreun e qeverisë në Gjykatën e Lartë për shpifje. Padi kjo, që me shumë gjasa do të pushohet nga pesëshja gjykuese e kësaj Gjykate, e cila dje u përzgjodh mbi bazën e shortit me gogla. Sipas njoftimit të Gjykatës së Lartë, mësohet se për gjykimin e kësaj padie të regjistruar në Gjykatën e Lartë me nr.11/11 akti, janë përzgjedhur gjyqtarët Ardian Nuni (Relator i Çështjes), Arjana Fullani, Besnik Imeraj, Guxim Zenelaj dhe Medi Bici. Të pesë këta gjyqtarë pritet të caktojnë edhe datën e shqyrtimit të seancës së parë, ku përfaqësuesit e palës paditëse të çifti Peza të paraqesin pretendimet e tyre dhe provat për këtë deklaratë shpifëse.

Nga ana tjetër, më pas pala akuzuese, konkretisht avokatët e kryeministrit Sali Berisha të paraqesin pretendimet e tyre mbrojtëse dhe më pas togat e zeza të shprehen me vendim. Vendim, ky që tashmë dihet, pasi po kjo Gjykatë në dy vendime të tjera, ku akuzues ka qenë kryeministri Sali Berisha ka vendosur pushimin e padive, me pretendimin se “deputetët nuk mbajnë përgjegjësi civile apo penale për deklaratat e bëra nga foltorja e Kuvendit”. Kështu që edhe padia e çifti Peza, pritet të arkivohet në këtë Gjykatë me vendim pushimi.

Sipas të dhënave të siguruara nga vendimet e togave të zeza, mësohet se pas deklaratës së kryeministri Berisha, ka qenë fillimisht kreu i PS-së Edi Rama që i është drejtuar Prokurorisë së Përgjithshme me një kallëzim penal ndaj shefit të mazhorancës, duke e akuzuar për shpifje. Më pas, po për këtë akuzë kreu i PS-së me ndihmën e avokatëve i është drejtuar Gjykatës së Lartë, duke kërkuar që togat e zeza ta dënonin kryeministrin Berisha për shpifje. Kësaj padie të Rama, në atë kohë iu shtua edhe padia penale e nënës së tij, Aneta Rama e cila përveç se u shpreh se nuk do ta falte kurrë kryeministrin Berisha për deklaratat e tij perverse, kërkoi që edhe me vendim të Gjykatës të dënohet për “shpifje”. Por, edhe këto padi u pushuan me argumentin se nuk mban përgjegjësi për deklaratat e tij në Kuvend.

 

1.      Ardian Nuni, Relator i Çështjes

2.      Arjana Fullani

3.      Besnik Imeraj

4.      Guxim Zenelaj

5.      Medi Bici

 

 

 

Nëntor ‘09, fjalimi i Berishës

Parlamenti ynë ka parë e ka dëgjuar shumë gjëra, por fjalimi i Berishës më 26 nëntor 2009, mund të quhet si një nga fjalimet më të çmendura. Pas këtij fjalimi, kryetari i PS, Edi Rama, iu drejtua prokurorisë duke kërkuar që të hetojë për Berishën. Por prokuroria e pushoi çështjen. Atëherë Rama e dërgoi padinë e tij në Gjykatën e Lartë. Edhe kjo e fundit ka vendosur të pushojë çështje, duke i dhënë të drejtë prokurorisë. Kjo e fundit pati deklaruar se nuk ka elementë penalë në këtë fjalim. Më poshtë disa pjesë nga fjalimi i Berishës:

“Zoti Rama, cili është ai burrë, i cili ngrihet nga shtrati i së shoqes në kullën e Myslym Pezës dhe shkon në shtratin e dashit dhe të deshëve dhe e detyron të largohet natën e lemerisur Cili është ai burrë? Zoti Rama ke muaj të tërë që më lakon me diçka që unë e kam krenari shumë të madhe dhe largohet prej teje e lemerisur. Edhe ajo është një zonjë, edhe ajo është një motër edhe ajo është një vajzë shqiptare. Zoti Rama ti që lakon familjen çdo ditë, a mund të më thuash cili është ai burrë që rreh si kafshë te Piazza dhe i mbush hundët e fytyrën me gjak bashkëshortes në prani të personaliteteve shqiptare dhe kosovare. Je ti, s’është askush tjetër. Kjo është e vërteta”.

“Zoti Rama ke një nënë të nderuar, për të cilën kam pasur dhe kam respekt, pavarësisht se vinte nga një backround kriminel se ishte mbesa e Spiro Kolekës, e njërit prej xhelatëve të intelektualëve shqiptarë, por ajo vetë s’kishte asnjë manifestim të tillë. Një ditë, kjo zonjë e nderuar, për të cilën kam respekt dhe do kem, më bën një letër të hapur. Mendova, po Neta mirë, e shoh ia kishte shkruar i biri. I lutem zonjës: Kam shumë respekt për ty, por është në integritetin, në nderin tënd tu tregosh shqiptarëve se e ke mjekuar djalin tënd, Edvin Ramën 10 vjet për skizofreni, dhe e kanë mjekuar kolegët e mi, tua thuash shqiptarëve, kur e sheh se ç’po u bën dhe ç’përpiqet tu bëjë dil me kurajë si nënë shqiptare dhe ngriju mbi sentimentin e një djali që të ka nxjerrë me lecka nga shtëpia e tij me rroba gjumi në Pazar, dil sepse është në interesin tënd më të mirë”.