Dhembe makutesh

Publikuar me : 01.12.2011 Ne : Kuriozitete - 50 Lexime. Origjina : Gazeta Shekulli

Vargje nga Arben Duka

 

Këta të tanishmit,

Nuk janë thjesht hajdutë,

Siç thosh’ dikur Sala,

Më shumë janë makutë!

 

Në mend nuk i shkonte,

Kurrë as Arben Dukës,

Se shteti do vidhte,

Dhe gramët e bukës!

 

Atje në Bruksel,

Të ngrirë mbenë arbitrat,

Këtu shteti vjedh,

Edhe mililitrat!

 

Kjo nuk është aspak,

Lajthitje poeti,

Kur të vjedh nëpunësi,

Të ka vjedhur shteti!

 

Banda e peshores,

Nuk është shumë problem,

Këtu kusaria,

U bë fenomen!

 

Nga shtetar’i vockël,

E gjer lart në majë,

Ka mendësi ujku,

kë dele do hajë!

 

Nga shtetar’i vockël,

Gjer te qeveria,

Të tërë janë fiksuar,

Te hajdutëria!

 

Këtë gjë e shihni,

Pa dyshim dhe vetë,

Si ca peshq të vegjël,

Kanë mbetur në rrjetë!

 

Ndërsa peshkaqenët,

Që ka korrupsioni,

Asnjëherë në pranga,

Nuk do t’i shikoni!

 

Se kanë dhëmbë të mprehtë,

Më të mprehtë se shpata,

Dhe me ata dhëmbë,

Ata hanë gjykata!

 

Peshkaqenët kanë,

Kohën më të artë,

E hëngrën pesë herë,

Gjykatën e Lartë!