Dita e Rinise, Rama Eshte koha qe demokracia te fitoje per njerezit

Publikuar me : 08.12.2011 Ne : Politike - 49 Lexime. Origjina : Gazeta Shekulli

Kryesocialisti Rama ka kujtuar lëvizjen e studentëve të dhjetorit në Ditën e Rinisë. Nëpërmjet një mesazhi të shpërndarë në rrjetin social Twitter, Rama shprehet se në vitin 1990, ishin të rinjtë ata që fituan demokracinë, por 21 vjet më pas demokracia duhet të fitojë për ta.

“Në 8 dhjetor 1990, njerëzit nisën të fitojnë demokracinë. Sot ka ardhur koha që demokracia të fitojë për njerëzit”, shkruan Rama në “Twitter”.

 

 

 

AK: E donim Shqipërinë si Europa, PD e PS na lanë jashtë saj  

Në Ditën e Rinisë, Aleanca Kuq e Zi ka zgjedhur të mos festojë, por t’u gjendet pranë të rinjve dhe fëmijëve të sëmurë duke dhuruar gjak. Në një deklaratë për mediat, përfaqësues të AK u shprehën sot se ëndrrat dhe idealet e të rinjve të viteve ’90 nuk janë realizuar ende. “Në dhjetor 1990 e donim Shqipërinë si gjithë Europa. Në dhjetor të 2011-s, PD e PS na lanë jashtë Europe”.

Në një tubim të organizuar në sheshin “Nënë Tereza”, përfaqësues të AK thanë se në 21 vitet pas rënies së komunizmit, politika shqiptare u ka pirë gjakun të rinjve.

 

* * *

Sot, Dita e Rinisë

8 dhjetori është shpallur me vendim të Parlamentit si Dita Kombëtare e Rinisë, në kujtim të lëvizjes studentore të vitit 1990.

Në 8 dhjetor 1990, një grup studentësh e pedagogësh të Universitetit të Tiranës bojkotuan mësimin dhe nisën protestën që do të shënonte një kthesë në historinë e vendit.

Protesta e të rinjve, e cila zhvillohej për mungesën e energjisë elektrike, kushtet e ekonomike dhe jetesën e vështirë në konvikte, mori përmasa akoma më të mëdha pas dhunës së ushtruar nga pushteti komunist.

Me thirrjen “E duam Shqipërinë si gjithë Europa”, rinia e asaj kohe zhvilloi një sërë manifestimesh që u shoqëruan me kërkesën për lejimin e pluralizmit politik në vend, kërkesë që u pranua më pas nga Presidenti Ramiz Alia.

G. N / Redaksia Online