Doganat Makinat do te paguajne 20perqind te vleres

Publikuar me : 25.08.2011 Ne : Ekonomi dhe Biznes - 53 Lexime. Origjina : Gazeta Shekulli

Emirjon Senja

TIRANË- “Dogana e makinës është hequr, por pagesa e Tatimit mbi Vlerën e Shtuar në masën 20 për qind do të paguhet nga të gjithë personat që sjellin në Shqipëri një makinë të re”. Kjo është deklaruar dje nga Sajmir Laçi, drejtor i Tarifës, në Drejtorinë e Përgjithshme të Doganave. Dje ka hyrë në fuqi ligji i ri dhe të gjitha makinat që hyjnë në vendin tonë nuk do të paguajnë më tarifën doganore.
“Me këtë ligj dua të theksoj që u arrit një avancim shumë më i drejtë se më përpara. Kemi rregulluar sistemin e taksave bazuar në vjetërsinë e makinës, nivelin e harxhimit, madhësinë kubike të motorit dhe detyrimeve që paguhen përkatësish nga autoritetet fiskale shqiptare. Që nga dita e sotme (dje) në të gjitha degët doganore, qofshin këto kufitare apo dogana të brendshme është e mundur që depozitohet deklarimi dhe detyrimet e importit përfshijnë vetëm TVSH”,- tha Sajmir Laçi.

TVSH do të paguhet në bazë të një sistemi reference të hartuar nga doganat shqiptare. Për çdo lloj makine doganat kanë vendosur një çmim bazuar në tipin, vitin e prodhimit dhe fuqinë motorike. Edhe nëse makina deklarohet me një vlerë shumë të ulët, TVSH që
paguhet për të bazohet në sistemin e referimit. Kjo vlen edhe për makinat që deklarohen të falura ose të dhuruara. Në të gjitha rastet ato do të paguajnë 20 për qind të vlerës së referencës. Pra nuk shërben deklarimi i një vlere minimale për makinën e importuar nga jashtë pasi TVSH do të paguhet në nivelin e vendosur nga shteti në bazë të çmimit të referencës.

“Me këtë rast dua të korrigjoj ndonjë deklarim që është bërë në media, ku thuhet se taksa bëhet zero, por taksa bëhet zero për detyrimet e autoveturave të përdorura gjithmonë. Detyrimi i TVSH –së është 20 perqind dhe llogaritet mbi vlerën e mallit që deklarohet në doganë në bazë të viteve të përdorimit”,- tha Laçi.