Europa kercenohet nga ndarja, Britania kunder traktatit te BE

Publikuar me : 09.12.2011 Ne : Ekonomi dhe Biznes - 82 Lexime. Origjina : Gazeta Shekulli

 Liderët europianë kanë rënë dakord për shtrëngimin e politikave fiskale në zonën euro, por nuk kanë arritur dot në një marrëveshje për të bashkuar të 27 vendet e Eurozonës në një traktat të ri të përbashkët për të përballuar krizën financiare.

 Pas dhjetë orë bisedimesh, hapat e bërë përpara janë shumë të limituar, me përjashtim të impenjimit të liderëve europianë për të punuar për një pakt të ri fiskal, term që u përdor për të përshkruar një regjim masash shtrënguese që do të sillnin izolimin e zonës euro nga kriza e borxheve.

Presidenti i Bankës Qendrore Europiane, Mario Draghi, e ka cilësuar vendimin një  hap përpara drejt bashkimit fiskal, i konsideruar si i domosdoshëm deri në rimëkëmbjen e ekonomive të 17 vendeve të eurozonës.

Duke folur të premten nga Brukseli, Presidenti i Francës, Nikoas Sarkozi, informoi se është vendosur që 17 vendet e Eurozonës dhe 10 vendet e tjera jashtë saj që formojnë Bashkimin Europian do të punojnë për dy pakte të ndryshme.

Franca dhe Gjermania kanë lajmëruar se do të punojnë së bashku drejt krijimit të një traktari të ri financiar, në të cilin do të përfshihen sanksione për vendet që do të abuzojnë me financat e tyre.

Lëvizja franko-gjermane ka gjetur rezistencë midis vendeve si Britania, me pretendimin se redukton sovraniten kombëtar.

Sarkozy shpjegoi se mospërputhja me Britaninë qëndronte mbi disa pika, ku Londra kërkonte që të ishin opsionale dhe të ekzistonte mundësia e tërheqjes në të ardhmen. Ai hodhi tërësisht poshtë pretendimet se ndryshimet e reja në traktat janë duke formuar një Europë bipolare, të drejtuar nga aksi franko-gjerman.

Vendimi i Londrës për të mos u përfshirë në traktatin e ri për Europën u pasqyrua në bursat ndërkombëtare me një rënie të menjëhershme.