Fajon Rivendosja e vizave, Ballkani rrezikohet

Publikuar me : 16.12.2011 Ne : Politike - 95 Lexime. Origjina : Gazeta Shekulli

“Mekanizmi për kthimin e vizave me procedutë urgjente në situata të jashtëzakonshme, mund të miratohet në gjysmën e parë të vitit të ardhshëm”. Kështu ka deklaruar Tanja Fajon, anëtare e Komitetit të PE-së për Liritë Civile, gjatë një interviste dhënë për “Deutche Welle”.

“Kjo nuk është aspak e re. Për propozimin e Komisionit për pezullimin e regjimit pa viza për një vit e gjysmë apo kohë më të gjatë, tashmë një kohë të gjatë po diskutohet kjo me Këshillin, Komisionin dhe Parlamentin Evropian. Ajo që PE kërkon është që të ketë rol më të madh në tërë procedurën, dhe në rast të një situate ku një vend anëtar kërkon pezullimin e vizave, kjo të mos ndodhë brenda natës. Duhet të ketë mekanizma për të parandaluar që një vend anëtar, t’a përdorë këtë mekanizëm si një mjet politik”,  tha më tej eurodeputetja sllovene.

E pyetur nëse ekziston rreziku real për Ballkanin Perëndimor, për pezullimin e regjimit pa viza, Fajon thekson: ”Ky rrezik ekziston tanimë që nga fillimi dhe veçanërisht në rrethanat ku jemi sot. Numri i atyre të cilët po kërkojnë ndryshimin e të drejtave të Shengenit, ndryshimin në liritë e lëvizjes, po rritet gjithnjë e më shumë dhe nga e gjithë kjo është i kërcënuar regjimi i heqjes së vizave.”