Familjet deklarojne te ardhurat ne prill

Publikuar me : 05.01.2012 Ne : Ekonomi dhe Biznes - 48 Lexime. Origjina : Gazeta Shekulli

Viti i Ri shënoi fillimin e një praktike të re të administrimit të të ardhurave personale. Çdokush që realizon më shumë se 200 mijë lekë të ardhura nga rroga mujore apo burime të tjera duhet të plotësojë një formular të posaçëm për të ardhurat dhe shpenzimet, nga i cili administrata tatimore do të mësojë mbi gjendjen financiare të çdo familje gjatë një viti. Ndryshimet ligjore të miratuara rreth një vit e gjysmë më parë hynë në fuqi që prej datës 1 janar të këtij viti dhe në këtë mënyrë të gjitha kryefamiljarët duhet të plotësojnë formularin deri në fund të prillit të këtij viti.

Që prej kësaj date, marrja dhe ruajtja e kuponëve tatimorë do të jetë një veprim i rëndësishëm, pasi me anë të tyre familjet do të kenë mundësi të justifikojnë shpenzimet. Gjatë plotësimit të deklaratës tatimore, kryefamiljari do të shënojë shumën e të ardhurave nga njëra anë dhe atë të shpenzimeve nga ana tjetër, nëse bilanci del pozitiv, pra familja ka pasur më shumë të ardhura se sa shpenzime, diferenca do të tatohet me 10 për qind, ndërsa nëse bilanci del negativ, shteti do të kompensojë taksat e tepërta.

Me ndryshimet e miratuara sëfundmi në ligj, qeveria ngushtoi kufirin e shpenzimeve të zbritshme për qëllime kurimi duke i ulur ato. Bëhet fjalë për shpenzimet që nuk mbulohen nga Sigurimi Shëndetësor. Deri në ndërmarrjen e ndryshimeve nuk kishte një kufi maksimal për sasinë e parave që konsideroheshin shpenzime të zbritshme në këtë drejtim, ndërsa me ndryshimet e miratuara rreth 10 muaj më parë, ato u kufizuan në 8 532 lekë për person.

Çdokush që është subjekt i deklarimit të të ardhurave kur të bëjë bilancin do të shtojë tek shpenzimet e kryera edhe shumën në fjalë. Nëse deklarimi bëhet nga kryefamiljari, këtij i njihen si shpenzime të zbritshme 8 532 lekë për secilin anëtar të familjes por jo më shumë se 32 mijë lekë.