Festivalet ankohen. Ministria iu thote Ne rresht

Publikuar me : 23.06.2011 Ne : Kulture - 248 Lexime. Origjina : Gazeta Shekulli



Ministria e Kulturës ka bllokuar Festivalet Ndërkombëtare dhe pa këtë mbështetje nuk mund të bëjmë hap. Mesazhi i dy drejtorëve të festivaleve ndërkombëtare të teatrit dhe danc teatrit, është një këngë e vjetër që nuk i flet kohës. Ne jemi përgjigjur me profesionalizëm, me nivelin e trupave ndërkombëtare që kemi sjellë si në Durrës thotë Gjergj Prevazi, drejtor i Festivalit Ndërkombëtar të Dancit Bashkëkohor, si në Butrint, shton Alfred Bualoti, drejtor i Festivalit Ndërkombëtar të Teatrit “Butrinti 2000”. Reagimi i këtyre palëve ndodh sa herë vjen stina e festivaleve që ata drejtojnë. Argumentet e tyre vetëm sa janë vendosur në një sfond të bardhë që ka kyçur në asfiksi gjithë kulturën klima politike. Drejtorët thanë se e kanë kapërdirë shtyrjen e aktiviteteve, por nuk tolerohet që Ministria e Kulturës nuk ka hapur akoma ofertat e saj për projektet kulturore. MKTRS është pa ministër dhe ka ngecur në vend puna për ngritjen e Qendrës së Artit dhe Kulturës e miratuar me Ligjin e ri “Për Artin dhe Kulturën” në vjeshtë 2010.

Drejtorët u pyetën për rezultatet konkrete të festivaleve, për mbështetjen nga pushteti vendor, përpjekjet për të mos i mbajtur sytë vetëm nga ministria. E pikërisht atëherë, tonet e njërit prej drejtuesve, nga vajtues u bënë akuzues në drejtim të medias: pse nuk e ngrini zërin për këtë skandal?

Disa orë pas konferencës për shtyp reagoi Ministria e Kulturës. Nikolla Lena Drejtor i Përgjithshëm i Politikave të Artit, tha se është vërtet për të ardhur keq që kryetarë të shoqatave të cilët janë edhe punonjës të shtetit, të aludojnë që MTKRS nuk ka politika. “Të punësuar njeri shef në Akademinë e Arteve dhe tjetri aktor pranë Teatrit Kombëtar, ku prej vitesh merr rrogën pas asnjë dalje në skenë e për me tepër zyra e Festivalit të Butrintit ka qenë dhe funksionon pranë Teatrit Kombëtar. Ju pyes: Festivali i Butrintit për më se një dekade ka marre qindra milionë lekë, apo danci i Gjergj Prevazit i mbështetur me shuma të konsiderueshme fondesh financiare, vallë realizoheshin nëpërmjet mungesës së politikave?!”

Drejtori Lena shtoi se MTKRS nuk do të shkelë shanset e barabarta për të gjitha artistët që kërkojnë prej saj mbështetje. Me një fjalë, ministria do të rishikojë edhe politikat e mbështetjes se këtyre festivaleve “mbi kritere të standardizuara me ato evropiane”. Mesazhi është që financimi i festivaleve ndër vite të shkojë “drejt pavarësisë financiare dhe jo në mbështetje totale nga MTKRS, por duke thithur fonde nga donatore e investitorë”.

Deklarata e zotit Lena konfirmon se ministria e ka krijuar me duart e veta rrethin vicioz, se e di që paguan njerëz që nuk punojnë, që jep miliona për festivale që i quan pa duk e që drejtohen nga njerëz në konflikt interesi, dhe del para medias për të larë atë që ndyn.

e. d