Gjirokaster, percillet per ne banesen e fundit oficeri i policise qe humbi jeten ne aksident

Publikuar me : 14.12.2011 Ne : Kronike - 56 Lexime. Origjina : Gazeta Shekulli

Para përcjelljes për në banesën e fundit, trupi i pajetë i oficerit të policisë Nuri Kërçani, që humbi jetën në krye të detyrës është vendosur në mjediset e Drejtorisë së Policisë së Qarkut Gjirokastër për kryerjen e homazheve.

Në mesditë, dhjetëra banorë, efektiva të Policisë së Shtetit, përfaqësues të administratës publike, pushtetit vendor, partive politike, miq dhe të afërm, kanë vendosur kurora me lule si dhe janë përkulur me nderim dhe respekt përpara kujtimit të oficerit të policisë Kërçani.

I pranishëm në këtë homazhe, zëvendësdrejtori i përgjithshëm i Policisë së Shtetit, Rasim Boriçi, është shprehur se i gjenden pranë familjarëve të efektivit Kërcani në këto momente të rënda për ta. “Pjesëmarrja e dhjetëra qytetarëve në këto homazhe tregon respektin për oficerin e policisë të rënë në krye të detyrës dhe në përgjithësi për strukturat e Policisë së Shtetit”, ka pohuar Boriçi.

 

Më pas oficeri i policisë Kërcani është përcjellë për në banesën e fundit në varrezat e fshatit Asim Zeneli, ndërsa flamuri i policisë së shtetit u është dorëzuar familjarëve të tij.

 

40-vjeçari Nuri Kërcani humbi jetën pasditen e së martës së bashku me kolegun e tij Petrit Lata, 43 vjeç në një aksident rrugor. Dy oficerët e policisë po ktheheshin në komisariat pas kontrollit të ushtruar në postbllokun e Këlcyrës. / E.Bani