Publikuar me : 26.01.2012 Ne :
Kronike - 26 Lexime. Origjina : Gazeta Shekulli
GJIROKASTËR- 150 kilogramë lëndë narkotike dhe tri pistoleta janë sekuestruar nga policia e Gjirokastrës gjatë operacionit të koduar “Akulli”.
Burime zyrtare të Drejtorisë së Policisë së Qarkut Gjirokastër kanë bërë të ditur se pas informacioneve të marra në rrugë operative, specialistët e Sektorit të Luftës Kundër Narkotikëve gjatë orëve të para të mëngjesit të së enjtes kanë zhvilluar një operacion në vendin e quajtur “Pylli i Katundës”, në kufi me Greqinë.
“Gjatë operacionit 6 shtetas po transportonin 4 çanta të mëdha me lëndë narkotike. Gjatë ndjekjes 6 personat kanë shkëmbyer zjarr me policinë. Nga kundërpërgjigjja e policisë të 6 shtetasit kanë braktisur lëndën narkotike si dhe 3 pistoleta dhe janë larguar drejt shtetit grek”, kanë bërë të ditur burimet zyrtare.
Të njëjtat informacione pohojnë se për të ndaluar transportuesit po bashkëpunohet edhe me policinë greke, ndërsa operacioni vazhdon. /
Entela Bani
