Publikuar me : 12.12.2011 Ne :
Politike - 54 Lexime. Origjina : Gazeta Shekulli
Procesi penal në ngarkim të ish-zv.kryeministrit Ilir Meta vijoi sot me marrjen në pyetje të pesë dëshmitarëve. Prokuroria në seancën e sotme të gjyqit ndaj Ilir Metës ka kërkuar të administrojë provat mbi të cilat kreu i LSI-së akuzohet për korrupsion aktiv.
Organi i akuzës kërkoi administrimin e laptopit, usb-së dhe orës video- regjistruese. Avokatët e Metës kundërshtuan një kërkesë të tillë ndërsa Gjykata pritet të shprehet në seancën e 16 dhjetorit mbi këtë kërkesë.
Në seancën e sotme kanë dëshmuar 5 dëshmitarë të thirrur për këtë çështje. Mes tyre ishin edhe vëllezërit Tola që administrojnë shoqërinë me të njëjtin emër.
Ymer Tola është shprehur para trupit gjykues se 700 mijë euro është vlera e investimeve në hidrocentralin e Shushicës. Kjo shifër është përdorur nga Meta në video-regjistruesin e bërë publike nga vetë Dritan Prifti.
Deri tani asnjë nga dëshmitarët e thirrur nuk ka dëshmuar kundër Ilir Metës ndërsa i vetmi mbetet Dritan Prifiti.
Më parë kanë dëshmuar Agim Rrapajt, Eden Rrapajt, Rezart Taçit dhe Fatmir Merkajt, të dhëna në seancën e javës së kaluar.
Agim Rrapaj ka dëshmuar në cilësinë e këshilltarit të shoqërisë “Vëllezërit Tola”. Ai ka thënë se shoqëria kishte si qëllim ndërtimin e hidrocentralit mbi lumin Shushice, në të cilën bënin pjese 10 kompani tre prej të cilave të huaja. Rrapaj ka pranuar se ishte ankuar ne zyrën e Metës në lidhje me vonesat e procedurave për koncesionin e HEC-it, në prani edhe të ministrit të Shëndetësisë Petrit Vasili.
Sipas biznesmenit, nga vonesat e procedurave shoqëria kishte pasur një dëm mbi 700 mijë euro, për të cilën i kishin dërguar një memo edhe METE-s. Biznesmeni ka pranuar se ishte telefonuar një herë nga Ilir Meta dhe ky i fundit i kishte kaluar Dritan Priftin.
Gjatë bisedës, Prifti i kishte kërkuar ti dërgonte nëpërmjet protokollit vendimin e Gjykatës se Apelit. Dëshmitari Fatmir Merkaj, administrator i ‘Merkaj Shpk’ një kompani, e cila u bë pjesë e bashkimit të shoqërive “Vëllezërit Tola”, për të ndërtuar hidrocentralin mbi lumin Shushicë, gjatë rrëfimit të tij pranoi se ish-ministri i Energjetikës i kishte kërkuar një dhuratë.
Por kjo dëshmi është hedhur poshtë nga gjykata pasi Merkaj nuk e kishte bërë këtë deklarim gjatë dëshmisë në prokurori. Ndërkohë biznesmeni Rezart Taçi foli për pjesën e ARMO-s dhe AlbPetrolit. Dëshmitari deklaroi se kishte njohur Bekim Halilajn, por nuk e kishte pranuar propozimin e tij për dhënien me qera të një rafinerie.
