Çipi Shpresojme qe FSHF-ja te mos beje harakiri!

Publikuar me : 02.02.2012 Ne : Sport - 36 Lexime. Origjina : Gazeta Shekulli

 Endi Tufa

Një ditë pas asaj që ndodhi në Pogradec në ndeshjen e Kupës së Shqipërisë mes Skënderbeut dhe Flamurtarit, ku u godit gjyqtari anësor i takimit, drejtuesit e Flamurtarit kanë reklamuar pranë FSHF-së pretendimet e tyre për marrjen e trepikëshit në tavolinë. Shefi i klubit, Geri Çipi, beson dhe është i sigurt se disiplina do t’i japë pikët e kësaj ndeshjeje, të cilat sipas tyre janë të merituara në bazë të rregullores.

“Ne nuk e prishëm ndeshjen në Pogradec, ashtu si na kanë akuzuar. U bë një padrejtësi pasi në bazë të rregullores, kur goditet gjyqtari, duhet ndërprerë loja ose të luhet për publik, por trepikëshi është yni. Ai gjyqtar nuk ishte në parametrat për të drejtuar një ndeshje të tillë si Skënderbeu-Flamurtari. Por nuk ishte faji i tij, pasi e detyroi delegati i ndeshjes Arsen Hoxha që ta vazhdonte ndeshjen. Besojmë të marrim këto tre pikë se na takojnë e shpresojmë që FSHF të mos bëjë harakiri”, thotë shefi i klubit Flamurtari, Geri Çipi.

Ndërkohë marrëdhëniet mes tifozerisë janë acaruar ndjeshëm duke rikujtuar atë situatë të një edicioni më parë, kur këto dy skuadra luftonin për titullin kampion. Gjithsesi, Çipi siguron se do të merren të gjitha masat e duhura për ndeshjen e kthimit në Vlorë, për të mos u përsëritur çfarë ndodhi një vit më parë.

“Ne nuk kemi ndërmend të krijojmë probleme si një vit më parë, do të bëjmë të pamundurën që të zhvillojmë ditën e diel me Vllazninë një takim normal e pa probleme nga ana e tifozëve. Nuk mund të pajtohemi me dhunën”.

Ndeshja e dytë e kupës për turin çerekfinal për Flamurtarin do të zhvillohet ditën e diel në Vlorë ku skuadra që do të luajë atje, është Vllaznia e Shkodrës.