Kuzhe Jam gati te perballem me drejtesine!

Publikuar me : 26.01.2012 Ne : Sport - 74 Lexime. Origjina : Gazeta Shekulli

Endi Tufa

Pas deklarimeve të policise greke se në listën e ekipeve të trukuara nga një organizatë greke, ishte edhe kombëtarja shqiptare, ish-trajneri Kuzhe reagon duke i konsideruar ato shpifje. “Kuzhe nuk vendos baste. Jam i gatshëm të vij si në Shqipëri, ashtu edhe në Greqi të përballem me këto fjalë”, tha Kuzhe.

Ish-trajneri i kombëtares shqiptare, Josip Kuzhe, foli për herë të parë pas skandalit të përgjimeve në Greqi, ku ishte përfshirë dhe emri i tij dhe flitej për trukimin dy ndeshjeve të përfaqësueses kuqezi gjatë drejtimit të kroatit.

“Kur e mësova dje, fillova të qeshja, por më pas fillova të shqetësohesha për këtë, pasi nuk është ndonjë gjë e mirë të të dale emri për keq. Nuk e kam dëgjuar ndonjëherë, nuk e di se kush është njeriu me pseudonimin Portugezi. Si mund t’i kontrolloj unë njerëzit që përdorin emrin tim në telefon?” tha Kuzhe. Kroati ka dhënë shpjegime edhe për dy ndeshjet e përfolura si të trukuara, atë me Argjentinën dhe Malin e Zi.

“Dua të bëj vetëm një pyetje: sa trajnerë ndryshojnë taktikën e lojes kur janë duke fituar? Është e pamundur që une t’u jap para lojtarëve, e pamundur që unë të blej Malin e Zi. Përballë Argjentinës e kam thënë që ne po shkojmë me lojtarë të rinj nga kampionati shqiptar. Humbja ishte normale, sepse dy muaj më parë Argjentina mundi kampionen e botës, Spanjën. Ne vinim nga pushimet dhe bëmë 2 seanca stërvitore. Pas ndeshjes isha i kënaqur pasi trajnerë të tjerë kishin humbur me rezultate të thella, 8-0, por ne taktikisht ishim shumë mirë. Dhe detyra ime është të përgatis taktikisht mirë skuadrën”, tha Kuzhe. Në shumë raste ka pasur akuza publike të bërë edhe nga strukturat evropiane të monitorimit, të futbollit, por kjo është hera e parë që përflitet për trukimin e ndeshjeve të kombëtares.