Publikuar me : 31.01.2012 Ne :
Politike - 51 Lexime. Origjina : Gazeta Shekulli
Emirjon Senja
Instituti i Statistikave ka qenë shpesh herë në qendër të akuzave, në lidhje me treguesit e publikuar prej tij, siç është përshembull rritja ekonomike, por duket se tashmë ato do të jenë edhe më të forta. Komisioni i Ekonomisë miratoi dje mes debatesh midis deputetëve të majtë dhe atyre të djathtë, kalimin e Institutit të Statistikave nën varësinë direkte të Kryeministrit të vendit. Deri më tani, INSTAT ka qenë një institucion nën varësinë e Këshillit të Ministrave, pra çdo vendim duhej të merrej në formë kolegjiale, kurse me ndryshimet ligjore të propozuara nga qeveria, tashmë vendimet do të merren vetëm nga Kryeministri.
Një gjë e tillë është pritur me kundërshti të forta nga ana e opozitës, e cila konsideroi këtë një veprim në drejtim manipulimit të të dhënave. Madje, nënkryetarja e Komisionit, Mimi Kodheli deklaroi se edhe tani, shifrat e publikuara nga INSTAT janë ato që deklarohen nga vetë Kryeministri gjatë mbledhjes së qeverisë dhe më pas certifikohen edhe nga instituti.
“Sot, me këtë ndryshim po sanksiononi ‘de jure’, gje që ndodh ‘de facto’, vartësinë totale që ka institucioni i INSTAT-it ndaj Kryeministrit, ndaj qëndrimi ynë në këtë rast është totalisht i kundërt me atë që keni sjellë. INSTAT-i duhet të jetë një institucion totalisht i pavarur, totalisht i besueshëm, për fat të keq nuk ka as njërën dhe as tjetrën sot. Ju siguroj që në momentin më të parë që do të vijmë në qeverisje, do ta kalojmë në një institucion të varur politikisht në varësi të parlamentit shqiptar”- tha Kodheli.
Deputetët e djathtë nga ana e tyre i shpjeguan ndryshimet ligjore me pamundësinë e kontrollit të punës së INSTAT-it në formën që është sot ligji për shkak të varësisë nga Këshilli i Ministrave.
“Deri më tani, kur në ligj nuk është përcaktuar saktë varësia e INSTAT-it, ky institucion është trajtuar si institucion në varësi të Qeverisë. Kjo mënyrë trajtimi sjell vështirësi praktike për përcaktimin e strukturave të Qeverisë që praktikisht është përgjegjëse për ndjekjen e veprimtarisë së institucionit dhe marrjen e përcjelljen e iniciativave të ndryshme në organet e larta vendimarrëse. Në kushtet kur Qeveria, si organ kolegjial, vepron në bazë të akteve që nxirren në mbledhje, është i pamundur ndjekja në vijimësi e veprimtarisë së institucioneve nën varësi”, – shpjegohet në relacionin e draftit që i është dërguar Kuvendit.
Komisioni miratoi ndryshimet ligjore me 10 vota pro dhe 4 kundër, ndërkohë që Kodheli deklaroi se ligji do të ndryshojë sërish kur PS të vijë në pushtet dhe INSTAT do të vendoset nën varësinë e Parlamentit. Komisioni miratoi dje kalimin nën varësinë e Kryeministrit edhe të Agjencisë së Prokurimeve Publike, gjë e cila hasi në më pak rezistencë nga opozita krahasuar me INSTAT-in, i cili është institucioni i parë që vjel në terren dhe përpunon më pas të dhëna, të cilat përdoren më pas për ndërtimin e politikave qeverisëse.
