Klosi Referendum per importin e plehrave

Publikuar me : 16.10.2011 Ne : Politike - 88 Lexime. Origjina : Gazeta Shekulli

Intervistoi: Denis Dedej

Sekretari Organizativ i Partisë Socialiste, Blendi Klosi, njëherësh deputet i kësaj force politike, shpreh mbështetjen mbi zhvillimin e një referendumi mbarëkombëtar për një moratorium për importimin e plehrave. Në një intervistë për gazetën “Shekulli”, zyrtari lart socialist vlerëson se në kuadër të aksionit të PS-së që do të ndiqet për ligjin e plehrave do të kërkohet dhe votim i fshehtë në Kuvend. Për sa i përket Kongresit të PS që do të mbahet më 5 nëntor, Klosi bën të ditur se do të kërkojë sëbashku me delegatët e Qarkut të Durrësit që Edi Rama të mandatohet si kryeministër për zgjedhjet e ardhshme. 

Zoti Klosi, më 5 nëntor do të mbahet Kongresi i Partisë Socialiste, i cili pritet të vendosë rrugën që do të ndjekë selia rozë deri në zgjedhjet e ardhshme parlamentare. Çfarë do të ndodhë në këtë Kongres?

Në datën 5 nëntor ne zgjedhim forumin më të lartë të kësaj partie, që është Kongresi i PS, i cili përbëhet nga një numër i madh delegatësh që zgjidhen me parimin “Një anëtar, një votë”, nga drejtuesit e bashkive dhe të komunave të PS në të gjithë vendin, nga drejtuesit e njësive dhe nga të gjithë deputetët e kësaj partie. E bëra këtë shpjegim për të thënë që i gjithë ky Kongres është i zgjedhur nga vota e drejtpërsëdrejti i të gjithë qytetarëve dhe anëtarësisë së PS-së. Prandaj të gjithë delegatët që do të zgjidhen më 22 nëntor me parimin “Një anëtar, një votë” janë përfaqësues të drejtpërdrejt të vullnetit të PS-së në të gjithë Shqipërinë. Është e pamundur që ky vullnet të manipulohet dhe të jetë i telekomanduar sepse ata janë zgjedhur nga çdo fshat, qytetet dhe njësi ku funksionon PS. Pra është vota e drejtpërdrejtë e socialistëve që zgjedhin delegatët, të cilët janë njerëz të spikatur në zona të caktuara, njerëz që në fund të fundit, e gjithë kjo trupë prej 1600 delegatësh, do të jenë barrikada e parë e cila do të ballafaqohen me garën e zgjedhjeve të ardhshme elektorale në vitin 2013, apo kurdo ato që të ndodhin.

Që do të thotë? Si do të ndikojë ky Kongres për aksionin e mëtejshëm politik?

E them këtë sepse është shumë e rëndësishme që kjo strukturë jo vetëm të ketë detyrat e saj për vendimmarrjen më 5 nëntor, prandaj po punohet fort për të zgjedhur njerëzit më të mirë, por duhet të jetë shumë herë më e përgjegjshme që detyrat e saj do duhet të jenë në të gjithë territorin e Shqipërisë për t’u ballafaquar me realitetin politik dhe keqqeverisjen e këtij vendi, për t’u ballafaquar me opozicionin qeveritar, për t’u ballafaquar me garën e ardhshme elektorale dhe për të dhënë atë çfarë presin atë çfarë presin më shumë se gjysma e qytetarëve shqiptarë, ndërrimin e madh të qeverisjes në garën e ardhshme parlamentare. Mendoj që këta delegatë dhe ky Kongres ka detyra shumë të mëdha përpara vetes. E them këtë sepse mendoj se nga data 5 nëntor dhe më pas PS s’ka asnjë ditë për të humbur, pasi duhet të përgatitet për garën e saj elektorale.

Si do të kryhet kjo përgatitje për zgjedhjet e ardhshme parlamentare?

Kjo përgatitje do të bëhet jo vetëm me ndryshimet që do të duhet në ndodhin në statut dhe në program, pasi edhe ato janë shumë të rëndësishme, më e rëndësishme se këto është vetë procesi, vetë diskutimi që kemi marrë me strukturat bazë të partisë. Po ashtu shumë e rëndësishme është se si do të implementohen këto vendime pas datës 5 nëntor. Ka ardhur koha që PS, ashtu siç e thotë një miku im, kryetar i PS-së në Pogradec, që të derdhet në popull. Ka ardhur koha që PS realisht të derdhet, ashtu siç kuptohet ky koncept në gjuhën shqipe. Duhet që strukturat e partisë të mos jenë të ngurta, të mos presin që njerëzit të afrohen tek ato. Struktura e partisë do të duhet të njohë çdo votues, çdo votë, qoftë kjo socialiste ose jo socialiste. Por, strukturat vetëm duke u derdhur në elektoratin socialist do të mund të njohë hallet, shqetësimet dhe po ashtu të përmbushë një detyrë shumë të madhe elektorale që do të duhet të marrë kongresi.

Në këtë Kongres do të miratohen dhe ndryshimet në statutin e PS-së. Ju jeni pjesë e këtij grupi pune për ta ndryshuar atë. Çfarë do të ndryshojë në këtë drejtim?

Për sa i përket ndryshimeve në statut, Kongresi do të duhet të jetë vendimtar për ndryshimin e strukturës së partisë, duke i dhënë asaj karakterin elektoral. E them këtë sepse është shumë e rëndësishme që forca jonë politike jo vetëm të prodhojë politikë, por që nëpërmjet të përzgjedhurve të saj të njohë realitetin në terren, të njohë problematikën e njerëzve, të njohë hallet dhe shqetësimet e tyre dhe më pas t’i transformojë ato në një program të fortë elektoral për të fituar zgjedhjet e ardhshme parlamentare. Forca jonë politike do të duhet të shndërrohet dhe në një forcë shumë të fortë elektorale. PS vetëm duke u derdhur tek qytetarët shqiptarë do të mund të kuptojë se sa votues ka në çdo qendër votimi. Organizatat socialiste do të duhet të dinë në çdo qendër votimi se sa votues janë socialistë, se sa janë demokrat, se sa janë të lëkundur që me to mund të punohet dhe se sa janë emigrant, si edhe sa nuk i njohin fare. Vetëm duke pasur një koordinim të gjithë strukturave ne mund të bëjmë atë që duhet ta bëjë shteti shqiptar. Shteti nuk prodhon sot një strukturë reale elektorale, databeizi i zyrave të gjendjes civile është i gjithi i manipuluar.

Cila është rruga që duhet të ndiqet nga socialistët për të ardhur në pushtet?

PS ka vetë një rrugë për të ardhur në pushtet nëpërmjet garës elektorale, duke u shndërruar në një mekanizëm të fortë elektoral që të njohë çdo votues dhe të ketë një kombinim shumë të fortë ndërmjet strukturave të kësaj partie, nga zonat rurale në zonat urbane, për të njohur se ku janë votuesit. Ne sot kemi një situatë që është alarmante. Në qytetin e Durrësit megjithëse është bërë një punë shumë e madhe dhe janë evidentuar me mijëra e mijëra votues, nga 160 mijë votues që janë në qytetin e Durrësit, 50 mijë ngelen të paidentifikuar. Nuk di njeri pse ekzistojnë në listat e Bashkisë së Durrësit 50 mijë votues. Por kjo është një masakër elektorale që mund të ndodhë në çdo moment nga Ferdinand Poni. Ndaj them se për PS-në, kjo duhet të jetë një detyrë e shtruar në kongres, pasi duhet të marrë mbi vete detyrën shumë të mëdha të mbrojtjes elektorale, jo vetëm të mbrojtjes të kutisë së votimit, por edhe të përgatitjes për mbrojtjen e votës nga vjedhja përmes manipulimit të listës.

A do të ketë ndryshime të modelit struktural apo vetëm kjo do të përshtatet?

Deri më tani që flasim kemi marrë një sërë ndryshimesh të mëdha në strukturat e partisë përmes forcimit të organizatave në çdo Qendër Votimi. PS dëshmoi në zgjedhjet e fundit se ne nuk na mjafton të kemi një strukturë partie në çdo Qendër Votimi, por ta kemi atë strukturë të fortë elektorale. Kjo strukturë që do të duhet të kemi për çdo Qendër Votimi duhet të mbajë mbi vetë intelektualë, njerëz të shquar të atij komuniteti dhe përfaqësues të grupeve të ndryshme, për të marrë mbi vete jo vetëm detyrën politike, por edhe të njohjes së elektoratit. Çdo gjë është klasike në strukturë. PS është e vetmja forcë politike që ngrihet nga baza në qendër. Të gjithë forcat e tjera ngrihen vetëm mbi forca individësh apo mbi urdhra padronësh politikë. Forca jonë politike ngrihet në mënyrë piramidale, kemi struktura bazë në çdo qendër votimi, pastaj kemi asamble socialiste në çdo qendër dhe komuna, kemi një strukturë të rrethit, pastaj një koordinim në nivel qarku dhe pastaj janë strukturat drejtuese të partisë. Kjo është skemë klasike kudo në botë për krijimin e një partie të madhe siç është PS. Mënyra e funksionimit të kësaj partie duhet të ndryshojë për sa i përket vendimmarrjes elektorale.

Po për sa i përket programit politik, çfarë duhet të ndryshojë?

Ka ardhur koha që PS të ketë një vendimmarrje të fortë në Kongres, një vendimmarrje e cila të përcaktojë qartazi dhe prerazi se ko parti është një forcë politikë e përgjegjshme, e ndërgjegjshme, por edhe e përgatitur për të marrë pushteti. Që nga data 5 nëntor e çdo ditë ne do të na duhet të punojmë fort për t’i ofruar elektoratit një program të qartë se pse duhet të na votojnë. Unë do të përpiqem ta kërkoj vetë sëbashku me delegatë të Qarkut të Durrësit që të përcaktohet qartë për përgatitjen e kësaj partie si forcë e marrjes së pushtetit dhe të caktohet qartë se që nga data 5 nëntor, forca jonë politike, Opozita e Bashkuar, paraqet Edi Ramën si kryeministër të vendit për të marrë pushtetin në zgjedhjet e ardhshme parlamentare kurdo ato qofshin. Është kjo shumë e rëndësishme pasi ne duhet të dëshmojmë se jemi barrikada e fortë opozitare në këtë vend dhe kushdo që kërkon të rrëzojë Sali Berishën do të duhet të jetë pjesë e kësaj barrikade të drejtuar nga Edi Rama.

Presidenti Topi ka rikthyer dy ditë më parë ligjin që lejon importin e plehrave në parlament për t’iu nënshtruar sërish një shqyrtimi dhe më pas të votohet. Si e konsideroni ju këtë vendim?

Unë kam qenë nga ata deputetë të cilët kam diskutuar në komisionet parlamentare, kam diskutuar në seancën plenare në të cilën u kalua në mënyrë abuzive një nga ligjet më të rëndësishme për sa i përket të ardhmes së këtij vendi. Unë i kam kërkuar zonjës Topalli në atë seancë që në emër të të gjithë atyre fëmijëve, grave, të rinjve, që ajo fut në sallën e Kuvendit, ta ndërpresë atë votim dhe ta kthejë projektligjin, i cili nuk ka të bëjë vetëm me deputetët dhe këtë brez që jeton në Shqipëri, por ai mund të jetë një ligj katastrofë për 2-3 brezat e ardhshme, pasi i hapet rruga Shqipërisë për t’u bërë një hambar plehrash, i hapet rruga për t’u bërë një magazinë plehrash. Edhe atë që ne kemi si një benefit, që jemi shumë pranë komunitetit europian, shumë pranë Italisë, Greqisë, vendeve të zhvilluara, të mos na kthehet në energji negative. Duke u bërë magazinë plehrash për këto vende ne kthehemi në një vend shumë të vështirë për të jetuar dhe në një vend me shumë probleme për të ardhmen.

Mendoni se mazhoranca do të reflektojë pas kthimit të këtij ligji?

Unë e kuptoj që paraja e korrupsionit, paraja e mafies në këtë fushë është shumë e fortë dhe kjo ia verbon sytë, mendjen, veshët dhe ia griu dorën deputetëve të Partisë Demokratike. Unë mendoj që ashtu siç ne deputetët opozitarë kemi qenë kundër këtij ligji dhe mundësia e artë e dhënë nga Presidenti i Republikës për të mos e votuar këtë ligj është një shans për reflektim nga Partia Demokratike.

Qeveria shprehet se përmes këtij ligji do të zhvillohet biznesi dhe se është sipas standardeve europiane. Si i vlerësoni këto argumente?

Argumenti që jepet nga përfaqësuesit e qeverisë se po zhvillohet biznesi vendas me përpunimin e mbetjeve në Shqipëri është një sarakzëm, nuk mund të gjej fjalë tjetër përveçse tragjikomedi se si mund të thuhet se po zhvillohet biznesi duke futur industrinë e përpunimit të plehrave të Shqipërisë, si mund të mendohet që mund të ketë zhvillim ky vend duke futur plehra nga e gjithë bota dhe e gjithë bota e krimit. Kjo pasi në Shqipëri nuk kemi asnjë kapacitet për të evidentuar dhe për të ndarë mbetjet. Se nuk ka mbetje të pastra, pasi ka mbetje të rrezikshme, nga ato me radioaktivitet deri në ato me lëndë të këqija për jetën e njerëzve. Kapaciteti për evidentimin e këtyre lloj mbetjeve në Shqipëri është zero, zero. Sot në Portin e Durrësit nga disa qeveri, nga SHBA, nga BE, nga Kina, por edhe nga vetë dogana shqiptare janë instaluar 3 skaner të fuqishëm për evidentimin e mbetjeve radioaktive. Pra, asnjë nga këto skaner nuk punon.

A ka vendi ynë kapacitetet e nevojshme për të ndaluar mbetjet e dëmshme?

Si mund të mendojmë ne se doganat shqiptare do të evidentojnë dhe të bëjnë ndarjen e ndryshme të plehrave kur ajo nuk bën dot ndarjen e tipave të ndryshme të divaneve, të televizorëve apo frigoriferëve që futen në Shqipëri. Në një sistem ku korrupsioni mbizotëron në këtë sistem tatimor, doganor dhe të kontrollit të kufijve, është e pamundur që të kemi një kontroll dhe evidentimin e tipave të ndryshme të plehrave të cilat nuk evidentohen me sy të lirë. Qytetarët shqiptarë duhet ta kenë të qartë se hapësira për të futur mbeturina dhe plehra nga Shqipëria është një han me shumë porta, që do të shërbejë për të futur plehra të cilat nuk mund të përpunohen në vendet e botës ose të cilat do të kërkojnë një kosto shumë të lartë. Kjo është çmenduri, gjëra që s’pranojnë qytetarët francezë, italianë apo maqedonas, serb, malazez, për të mos folur për vende më të zhvilluara si Danimarka, Holanda etj., këto plehra na i pranon Shqipëria vetëm e vetëm se një qeveritar, një kryeministër dhe një grup mafioz do të pasurohet.

Cili do të jetë aksioni që do të ndërmarrë PS për moslejimin e importit të plehrave?

Do të doja të mbështesja fort protestat e shoqërisë civile, protestat e zhvilluara nga FRESSH i Tiranës përpara Presidencës, do të doja të përshëndesja me të gjithë fuqinë e shpirtit tim kthimin mbrapsht të vendimit të Presidentit të Republikës. Por kjo do të duhet të jetë një moment reflektimi për deputetët e thjeshtë dhe të zakonshëm të PD-së. Kam bindjen që me një votim të fshehtë në parlamentin shqiptar ky ligj nuk mund të marrë më shumë se sa 5 vota, të cilët janë njerëz të afërt të kabinetit qeveritar dhe njerëz të cilët janë afër Sali Berishës. Në masë më të madhe, në 99 perqind parlamenti shqiptar nuk e voton këtë ligj, pasi siç e thashë, ky ligj nuk e ndan fëmijën e deputetit socialist nga ai demokrat, s’e ndan votuesin e majtë nga të djathtë, ky ligj nuk ndan brezin socialist që po jeton sot nga brezi i sotëm demokrat. Ky godet brezin e sotëm dhe të ardhshëm në total. Prandaj një votim i fshehtë në parlament i këtij ligji, mendoj se nuk do të marrë më shumë se sa 5 vota.

Ka pasur zëra për krijimin e një referendumi popullor mbi këtë ligj. A e mbështesni një hap të tillë?

Unë kam propozuar dhe në parlament. Por, parlamenti shqiptar vazhdon të jetë një shtëpi me dritare. Një dritare në të cilën ne flasim, kjo është për qytetarët shqiptarë, për njerëzit që na dëgjojnë në media dhe një dritare e mbyllur me gurë, hekur dhe beton, që është dritare që duhet të dëgjojë mazhoranca dhe qeveria. Ne vazhdojmë të themi se Shqipërisë i ka ardhur koha për kryerjen e një moratoriumi për importin e çdo mbeturine. Kjo pasi kapacitetet tona janë të pamjaftueshme për të evidentuar tipat e ndryshme të mbeturinave që futen në vend. Unë do të isha mbështes shumë i flaktë dhe do të kontribuoj me të gjithë mundësitë e mia dhe forcën time si qytetar, si individ, por edhe atributet që më jep detyra ime si deputet i parlamentit shqiptar për të qenë mbështetës i një referendumi mbarëkombëtar për një moratorium për importimin e plehrave. Ne nuk kemi mundësi të kontrollojmë gjë. Afërsinë me Europën nuk mund ta kthejmë nga pozitivitet në negativitet. Meqë jemi afër të jemi koshi i mbeturinave të Europës.

“Topalli njeriu i fundit pas Berishës që të flasë për anti-europianizëm”

Deputeti i Partisë Socialiste, Blendi Klosi, komenton akuzat e kryetares së Kuvendit, Jozefina Topalli, se Rama dhe Topi janë pjesë e celulës anti-europiane, duke vlerësuar se ajo është e vetmja që nuk mund të flasë për Europën. Gjithashtu i zgjedhuri socialist sqaron arsyet e mosvotimit të ligjeve që kërkojnë 3/5 e votave.

Zoti Klosi, prej kohësh në parlament ndodhen ligje që kërkojnë shumicë të cilësuar. Mazhoranca ju ka sulmuar për mosvotimin e tyre. Cilat janë arsyet që nuk i votoni këto kode?

Ka një debat shumë të madh për sa i përket votimeve me 3/5 në Kuvend. Në asnjë rast ne nuk kemi munguar sepse nuk duam të votojmë atë ligj. Ne vazhdojmë të kërkojmë një konsensus politik dhe votimet me 3/5 ligjvënësi nuk e ka vënë kot, pasi nuk janë ligje për qeverisjen, pro janë ligje për formimin e shtetit. Kur është bërë Kushtetuta është menduar që këto kode të jenë me konsensus. Çfarë konsensusi na ofrohet ne në parlament, vetëm mundësinë e votimeve të ligjeve. Në asnjë rast ne nuk e bëjmë se s’duam të votojmë kodet, por e bëjmë me vetëdije kërkesën për konsensus, për të ngritur një shtet europian. Na kërkojnë që të kemi një konsensus, që votimet me 3/5 të kenë një konsensus politik, i cili po refuzohet nga Sali Berisha. Ai është një njeri që po merr goditje nga të gjitha anët dhe po e dobësojnë. Vazhdoj të mendoj se Sali Berisha e bën të gjithë këtë sepse ai nuk e do Europën, nuk i do rregullat, nuk do një shoqëri ku të gjitha funksionojnë në mënyrë normale. Ligjet diskutohen kur konsensusi arrihet përmes forcave politike për qëllime madhore të një vendi.

Duke mbetur tek çështja e integrimit, kryetarja e Kuvendit, Jozefina Topalli, ka akuzuar kryesocialistin Rama dhe Presidentin Topi se janë anti-europianë. A keni një koment për këto akuza?

Nuk do të doja të shikoja filma aksion apo thriller ku unë mund të fantazoj. Qenia ose jo europiane dëshmohet në mënyrën se si funksion, në mënyrën se si punon. Ajo që po ndodh në parlamentin shqiptar është realisht anti-europiane. Është anti-europiane mungesa e hapësirës të kolegëve të PS-së për të folur. Është anti-europiane mungesa e hapësirës 5 minutash ku deputetët flasin për hallet e ditës. Është anti-europiane mënyra e drejtimit abuziv të parlamentit. Është anti-europiane vendosja e ndryshimeve të rregullores së Kuvendit, ku deputetët etiketohen dhe goditen, iu hiqet rroga, përjashtohen nga seancat parlamentare vetëm sepse ata bëjnë opozicion. Është anti-europiane e gjithë gjuha e përdorur në parlamentin shqiptar. Deri më tani Jozefina Topalli është e vetmja që nuk ka asnjë dëshirë më të vogël që të duket si europiane. Prandaj mendoj se është njeriu i fundit pas Sali Berishës që mund të flasë për anti-europianizëm në Shqipëri.

 

“Koalicioni i PS të zgjerohet mbi moralin, jo mbi para korrupsioni”

Një prej funksionarëve të lartë të selisë rozë shtron nevojën për krijimin e aleancave të reja në kuadër të zgjedhjeve të ardhshme parlamentare. Sekretari Organizativ në Partinë Socialiste shpjegon kriteret dhe parimet që do të përdoren për të zgjeruar aleancën.

Në kuadër të zgjedhjeve të ardhshme, PS duhet të që të mendojë dhe për aleancën e saj. Cilat janë kriteret që duhet të përdoren për të zgjeruar aleancën?

Për sa i përket zgjedhjeve të ardhshme, PS duhet të zgjerojë sa më shumë aleancën anti-qeveritare dhe do të duhet të krijojë aleanca nga të gjitha hapësirat dhe drejtimet për të pasur mundësinë që të marrë jo vetëm votën e saj, por për të arritur një fitore plebishitare dhe ne do ta arrijmë. Nuk mund të ndodhë në këtë vend që vota të shitet dhe të blihet në mënyrë abuzive dhe askush të mos flasë. Nuk mund të ndodhë në këtë vend që zgjedhjet të jenë krejtësisht të manipuluara dhe askush të mos flasë. Nuk mund të ndodhë në këtë vend ashtu siç po ndodh me votimet e këshillave të qarqeve dhe më pas cilësohen nga mazhoranca si fitore historike. A mund të cilësohet si fitore historike kur janë blerë 3-4 qenie njerëzore? Ky është fundi i demokracisë. Ne nuk duam koalicione të ngritura mbi para dhe mbi biznes. Nuk duam koalicione si ai i historikut të Beratit që haptazi votojnë kundër PS-së, por paraja e pushtet dhe korrupsionit blejnë 3-4 njerëz. Opozicioni nuk është çështje numrash, por çështje parimi. Por, parimi nuk blihet mbi para. Prandaj them se koalicioni që duhet të ofrojë PS duhet të jetë koalicion i ngritur mbi moralin, mbi luftën opozitare dhe jo të ngrihet mbi para korrupsioni.

Keni emra konkret për zgjerimin e kësaj aleanca apo këto do të jenë parimet që do të përdoren?

Emrat konkret janë shumë më pak se parimet. Ne do të duhet të bëjmë aleanca shumë më të fortë dhe të qëndrueshme me të gjitha ata që nuk duan Sali Berishën kryeministër.

 

Për Ramën

Unë do të përpiqem ta kërkoj vetë sëbashku me delegatë të Qarkut të Durrësit që të përcaktohet qartë për përgatitjen e kësaj partie si forcë e marrjes së pushtetit dhe të caktohet qartë se që nga data 5 nëntor, forca jonë politike, Opozita e Bashkuar, paraqet Edi Ramën si kryeministër të vendit për të marrë pushtetin në zgjedhjet e ardhshme parlamentare kurdo ato qofshin.

 

Për plehrat

Unë do të isha mbështes shumë i flaktë dhe do të kontribuoj me të gjithë mundësitë e mia dhe forcën time si qytetar, si individ, por edhe atributet që më jep detyra ime si deputet i parlamentit shqiptar për të qenë mbështetës i një referendumi mbarëkombëtar për një moratorium për importimin e plehrave. Ne nuk kemi mundësi të kontrollojmë gjë.

 

Për strukturat

Ka ardhur koha që PS realisht të derdhet, ashtu siç kuptohet ky koncept në gjuhën shqipe. Duhet që strukturat e partisë të mos jenë të ngurta, të mos presin që njerëzit të afrohen tek ato. Struktura e partisë do të duhet të njohë çdo votues, çdo votë, qoftë kjo socialiste ose jo socialiste.