Kontrolli, doganat nuk mblodhen 1.8 mln dollare

Publikuar me : 22.01.2012 Ne : Ekonomi dhe Biznes - 97 Lexime. Origjina : Gazeta Shekulli

E. Senja

Tatimet, doganat si edhe dhënia me qira apo shitja e pronave shtetërore janë sektorët, në të cilët abuzohet me shumë në drejtim të realizimit të të ardhurave në buxhetin e shtetit. Departamenti i Kontrollit të të Ardhurave në Arkën e Shtetit ka përfunduar një kontroll në dhjetor të vitit të shkuar në pjesën më të madhe të degëve të doganave në Shqipëri, në Drejtorinë e Përgjithshme të Tatimeve si edhe në disa Drejtori Tatimore Rajonale duke kapur një dëm total prej 1.8 milionë dollarë. Ky është dëmi i kapur vetëm nga ky departament nga kontrollet e ushtruara gjatë vitit të shkuar, por KLSH ka gjithsej katër departmente, të cilat kanë përfunduar tashmë analizat duke nxjerrë në pah miliarda lekë abuzime të të ardhurat, por edhe shpenzime nga buxheti i shtetit. Pjesë dërrmuese e dëmit është kapur në degët e doganave ku kampione për mosrealizimin e të ardhurave është dega e Doganës në Durrës, dëmi i të cilës përbën 77 për qind të totalit.

Në doganën e Durrësit është kapur një dëm prej rreth 143 milionë lekë. Shkeljet kanë të bëjnë kryesisht me mosmbledhje të detyrimeve ndaj subjekteve të ndryshme ku një pjesë të saj e përbën mosmbledhja e detyrimeve nga zhdoganimi i makinave apo artikujve të ndryshëm. Dogana e Durrësit është një ndër pikat më të mëdha hyrëse dhe dalëse në Shqipëri, me qarkullimin më të lartë të mallrave. Në vend të dytë për nga shuma e shkeljeve të kapura, renditet Dogana e Qafë Thanës me një vlerë 11.1 milionë lekë, më pas vjen Dega e Doganës së Kakavijës me një vlerë shkeljesh 9 milionë lekë, Qafë Thana me shkelje 8 milionë lekë, Dogana e Vlorës me 6 milionë lekë, etj. Krahas dëmit të kapur në dogana, probleme në mbledhjen e të ardhurave kanë shfaqur edhe tatimet, të cilat mundën të realizojnë vetëm 92.7 për qind të planit për 2011.

Departamenti i Kontrollit të të Ardhurave të Buxhetit të Shtetit kontrolloi 22 subjekte gjatë vitit të shkuar ku pas verifikimeve ka dhënë 139 masa administrative, nga të cilat janë zbatuar 61 të tilla. Po ashtu, KLSH ka kërkuar zhdëmtimin e të gjithë vlerës së dëmit të kapur në 339 raste, nga të cilat janë realizuar 102 kërkesa. Për sa i përket shkelësve, KLSH ka dhënë 60 masa disiplinore ndaj personave përgjegjës në nëntë institucione të kontrolluara. Masat janë të tipit: Largim nga Shërbimi Civil, pezullim nga e drejta e ngritjes në detyrë, kalim në një nivel më të ulët, etj.

 

 

Institucionet                                         Dëmi

 

Dogana e Kapshticës                          1.3 mln lekë

Dogana Elbasan                                  2              “

Dogana e Qafë Thanës                      11.1        “

Dogana e Kakavijës                           9              “

Dogana e Durrësit                                143         “

Dogana e Vlorës                                  6              “

Dogana e Shkodrës                             8              “

Dogana e Lezhës                                 0.5          “

Dogana e Korçës                                 3              “

Tatim-Taksat Vendore Durrës          1.5          “