Kuvendi, Bizhga- Nishanit Kush i mori parate e uniformave te policise?

Publikuar me : 11.11.2011 Ne : Politike - 87 Lexime. Origjina : Gazeta Shekulli

Kuvendi i Shqipërisë nisi sot rreth orës 10:30 punimet e seancës plenare të radhës me ratifikimin e dokumentit të amendimit numër një të marrëveshjes së ndihmës ndërmjet qeverisë së Shqipërisë dhe qeverisë së SHBA-së “Për qeverisje të drejtë dhe demokratike, investimin në njerëz dhe rritjen ekonomike”.

Kuvendi miratoi propozimet e kryetarit të grupit socialist për disa ndryshime në komisionet parlamentare. Nga lëvizjet e bëra deputeti Ditmir Bushati do të zërë vendin e Ermelinda Meksit në krye të Komisionit të Integrimit.

Deputeti Marko Bello do të kalojë nga Komisioni për Edukimin në Komisionin e Integrimit, ndërsa Paulina Hoxha do të zëvendësojë Bellon.

Ndërkohë që debate të ashpra janë bërë gjatë interpelancës me ministrin e Brendshëm, Bujar Nishani, kërkuar nga deputeti Gazmir Bizhga. Ai i kërkoi Nishanit të jap llogari për gjendjen në të cilën ndodhet policia shqiptare. Një nga problemet që ngriti ishte një tender i vitit 2009, që sipas tij la pa uniforma policinë e shtetit.

“Prej dy vjetësh policia pa uniforma, e zbathur për të ndjekur krimin. Cilat ishin arsyet që Policinë e Shtetit nga një polici me uniformë të vetën, po e vishni me uniformë të re, me elemente italiane?”, tha Bizhga, i cili akuzoi ministrin se elementet e uniformës së policisë janë të kopjuara, ndërsa shtoi se “Nishani është i vetmi ministër në Evropë që nuk ka kompetenca për uniformat e policisë. Ju dogjët fondin për uniformën e policisë në vitin 2009. Ku shkoi ky fond i taksapaguesve shqiptarë?”, u shpreh deputeti socialist.

Nishani gjatë përgjigjes së tij deklaroi se gjithçka është bërë në bazë të ligjit. Bizhga gjatë rimarrjes së fjalës deklaroi se qeveria ka shpërblyer kriminelët që më 21 janar derdhën gjakun e qytetarëve të pafajshëm me armët e shtetit.