Kuzhe Te shpresojme te kundersulmi!

Publikuar me : 02.09.2011 Ne : Sport - 38 Lexime. Origjina : Gazeta Shekulli

Trajneri i përfaqësueses së Shqipërisë Josip Kuzhe shprehet realist për takimin e sotëm kur ne do të përballemi me një nga përfaqësueset më të mëdha në Europë. Gjithsesi, kjo gjë nuk e ndalon skuadrën kuqezi dhe atë vetë të mendojnë për një rezultat pozitiv. “Nuk mund të pretendojmë që ndaj Francës të kemi një dominim të lojës.

Përkundrazi, presim që ata të jenë dominues e të mbajnë topin më shumë se ne. Nga ana tjetër loja jonë nuk do të jetë gjithmonë mbrojtëse, i gjithë synimi do të jetë që të kapim në befasi e në kundërsulm kundërshtarin. Vendosja e Currit në mesfushë është një frumëmarrje për ne, pasi është një lojtar agresiv, mund të futet në çdo duel e të rrezikojë portën kundërshtare me topat e lartë. Kjo zgjedhje është bërë pasi kemi parë formën e mirë të Telit në qendër të mbrojtjes,” – ka deklaruar trajneri Kuzhe.

Kapiteni Altin Lala nuk e ka të sigurt ende vendin në formacionin e parë, gjithsesi për këtë përballje ai deklaron: “Shpresojmë që nesër (sot) të jemi në formën maksimale tonën. Duhet të jemi gjakftohtë dhe të kujdesshëm me daljet përpara, nuk duhet të harrojmë që luajmë me Francën, një skuadër shumë e madhe dhe mbi të gjitha me një repart ofensiv të rrezikshëm.” Për kujdes dhe për të mos u trembur ka folur edhe zëvendëskapiteni Lorik Cana. “Ata janë në vendin e parë dhe sigurisht që kanë një lloj presioni mbi supe, pasi u duhet me doemos fitorja me ne dhe më pas do të udhëtojnë për në Rumani, një tjetër skuadër e fortë të cilën ata do të përpiqen ta fitojnë për të mbajtur vendin e parë në grup. Një nga mënyrat për të ndalur Francën do të jetë qëndrimi në grup.

Çdo veprim që bëjmë në fushë duhet ta bëjmë si skuadër. Nuk duhet të harrojmë se futbolli luhet me mendje e me zemër, por ne kemi këtë herë avantazhin edhe të mbështetjes së publikut. Kjo është një armë shumë e fortë për ne në ndeshjet brenda,”  – përfundon Cana.