Lac, prokuroria Edhe gjashte arrestime te tjera

Publikuar me : 08.12.2011 Ne : Sport - 67 Lexime. Origjina : Gazeta Shekulli

Flamur Vezaj

Prokuroria e Laçit ka lëshuar urdhërarresti edhe për gjashtë persona të tjerë përveç zv.presidentit dhe zv.trajnerit të skuadrës së Laçit, arrestuar mbrëmjen e së martës. Sipas prokurorisë, në mesin e personave që janë evidentuar duke qëlluar arbitrin janë edhe persona me precedentë penalë, për të cilët është lëshuar urdhër arresti. Për prokurorinë problem është bërë fakti që gjyqtari nuk pranon të bëjë kallëzim dhe të jap dëshminë, pavarësisht se është ai i dëmtuari në këtë mes.

Edhe katër arbitrat e tjerë janë thirrë në prokurori, por refuzojnë të paraqiten me arsyetimin e frikës.

Nga ana tjetër, arbitrat kanë dorëzuar në Federatë raportin e ndeshjes, ku kanë denoncuar përveç dy të arrestuarve, edhe presidentin e sport-klub Laçit, i cili pritet të merret në pyetje.

Paraditen e djeshme, prokurorët e Laçit me urdhër të drejtuesit Besim Hajdarmataj kanë zbarkuar në zyrat e Federatës Shqiptare të Futbollit ku kanë marrë të gjitha shkresat për ndeshjen në Laç.

Mësohet se fillimisht zyrtarë të Federatës nuk kanë pranuar të bashkëpunojnë, por pasi i kanë kujtuar veprën penale për fshehje dhe mosdhënie të provave, kanë pranuar t’i vënë në dispozicion materialet.

Ndërsa gjyqtari Jemini nuk ka preferuar të paraqitet edhe te Mjekësia Ligjore për të konstatuar dëmtimet e pësuara nga të rrahurat. Pritet arrestimi i personave të tjerë për akuzat e “kundërshtimit të forcave të rendit”, “prishjes së qetësisë publike” dhe “plagosjes për shkak të detyrës”.