Publikuar me : 18.12.2011 Ne :
Kuriozitete - 39 Lexime. Origjina : Gazeta Shekulli
Zoti Kryetar,
Në emër të Unionit të Gazetarëve Shqiptarë ju bëj të njohur faktin se ditët e fundit në redaksitë e gazetarëve dhe në selitë e të përditshmeve të shtypit shqiptar po diskutohet dhe hamendësohet për një nismë reformuese prej Bashkisë së Tiranës për tregun e shitjes së shtypit.
Madje në komunitetin tonë po flitet për mundësinë e ngritjes së një kompanie multiaksionerësh të cilët do të mundësojnë përfshirjen e aktorëve dhe grupeve të interesit në këtë ndërmarrje. Ne e mbështesim së pari idenë për reformimin e këtij sistemi shpërndarjeje dhe shitjeje të gazetave tona dhe shtypit të printuar në tërësi, pasi gjatë 20 vjetësh kjo gjendje vijon të mbetet e mjerueshme dhe jashtë cdo standarti dhe krahasimi me metropole të tjera europiane. Madje duhet pranuar se ky sistem i trashëguar në këto 20 vjet, është imazhi më përcudnues dhe më diskriminues për vetë titujt e gazetave dhe shtypit tonë epriodik në tërësi.
Mirëpo, nisur prej diskutimit të sapo hapur dhe disa shqetësimeve të përcjella prej sektorëve të menaxhimit dhe shpërndarjes së shtypit, ne ju drejtohemi ju si titullar i Bashkisë, që në emër të tagrit ligjor dhe administrativ, të siguroni transparencën maksimale për këtë reformë, gjithëpërfshirjen pa dallime dhe me një formulë kontribuimi që të mos përjashtojë askënd dhe të mos mundësojë selektivitet apo dallesa sipas preferencave politike mes aktorëve të këtij tregu të shtypit.
Njëkohësisht kërkojmë prej jush të inicioni dhe organizoni sa më parë një tryeze debati dhe sqarimi për detajet e këtij projekti.
Në pritje të reagimit
Aleksandër Çipa
Kryetar i unionit të Gazetarëve Shqiptarë
Një letër mbi të njëjtën temë i është nisur edhe OSBE-së
