Luan Rama Te kontrollojme punen e ministrave tane

Publikuar me : 30.07.2011 Ne : Politike - 167 Lexime. Origjina : Gazeta Shekulli

Lëvizja Socialiste për Integrim i është bashkuar zërave që kërkojnë reformë zgjedhore duke nisur me ndryshimin e Kodit Elektoral. Kreu i kësaj force, Ilir Meta është shprehur dje se “Zgjedhjet nxorën në pah rëndësinë e nisjes së një reforme zgjedhore, e cila t’i japë zgjidhje edhe qartësi çdo lloj problemi apo shqetësimi që lindi pikërisht nga bërja në mënyrë të nxituar e Kodit Zgjedhor disa vite më parë. Reforma zgjedhore duhet të ishte zhvilluar menjëherë pas zgjedhjeve të qershorit të vitit 2009. Është e rëndësishme që reforma zgjedhore dhe ndryshimet të cilat kërkohen edhe nga partnerët ndërkombëtarë të mos mbetet përsëri për minutat e fundit”. Këto vlerësime ai i ka bërë gjatë mbledhjes së Komitetit Drejtues Kombëtar të LSI-së. Në lidhje me ndryshimet kushtetuese që kërkohen nga opozita, Meta është shprehur se ajo është një çështje që nuk duhet të përzihet me reformën zgjedhore. Ai ka lënë të kuptohet se ndryshimet në Kod janë emergjente ndërsa ndryshimet në Kushtetutë mund të bëhen edhe në një moment tjetër, ose nuk mund të bëhen fare. “Kushtetuta është ligj themeltar i një shtetit dhe nuk mund të ndryshohet sa herë që ndryshon pozicion politik i një individi apo qoftë edhe i një force politike apo disa të tjerave. Apo qoftë edhe gjithë forcat politike. Kushtetuta është e të gjithë qytetarëve shqiptarë, është bërë me referendum dhe natyrisht çdo proces rishikimi duhet bërë në mënyrë transparente, duhet të ketë kohën e tij dhe nuk duhet të realizohet nën presionet politike të interesave të çastit”,- tha Meta.

Luan Rama

Ndërkohë sekretari i përgjithshëm, Luan Rama ka kërkuar një rotacion brenda posteve ministrore që ka LSI në kabinetin qeveritar. Bazuar në një praktikë të vjetër të LSI-së ku deputetë kanë dhënë dorëheqjen pas dy viteve për ti hapur rrugë personave të tjerë që ishin poshtë listës, Rama ka kërkuar analizë dhe ndryshim. “Është një realitet që duhet ndryshuar. Duhet ndryshuar dhe kuruar me maturi, me kujdes, por me vendosmëri. Natyrisht që ne nuk e kemi luksin të largojmë ndokënd, por gjithashtu nuk mund të vazhdojmë të eksperimentojmë më tej në dëm të interesave të LSI-së”,- tha Luan Rama. Këtë gjë ai e ka lidhur me ministrat e LSI-së në qeveri dhe ka kërkuar të bëhet një bilanc i punës së gjithsecilit dhe aty ku konstatohen probleme, të bëhen ndryshimet përkatëse. “Interesat e LSI-së janë dominante përballë interesave të secilit prej nesh dhe na imponojnë tani, sepse nesër do të jetë shumë vonë të ridimensionojmë fokusin e vlerësimit për performancën qeverisëse të LSI-së në të gjitha nivelet. Dy vjet janë të mjaftueshëm për të bërë një bilanc realist të gjithë çfarë kemi bërë, me qëllim që të ndërhyjmë për të korrigjuar dhe për të përmirësuar cilësinë e përfaqësimit dhe të produktit qeverisës”,- tha Luan Rama.