Maxhoranca shet “Albpetrol-in” me 72 vota

Publikuar me : 16.12.2011 Ne : Politike - 52 Lexime. Origjina : Gazeta Shekulli

Emirjon Senja

Maxhorancës i mjaftuan 72 vota e saj, kundrejt 62 votave kundër dje pasditen e djeshme për të miratuar shitjen e plotë të kompanisë shtetërore të naftës “Albpetrol”. Ligji i miratuar dje në Kuvend parashikon procedurat që do të ndiqen për shitjen e kompanisë shtetërore, ndërsa METE pritet të hapë tender për dhënien e saj tek një investitor strategjik.

Që prej paraqitjes së projektligjit një Kuvend, nisma e qeverisë është shoqëruar me debate të ashpra dhe akuza për korrupsion midis deputetëve të opozitës dhe atyre demokrat, të cilat shënuan kulmin dje. Të majtët akuzuan qeverinë se po shet për pak para resurset e vendit duke përmendur krahas “Albpetrolit” edhe kompanitë e tjera strategjike të privatizuar gjatë viteve të fundit, të cilat dështuan sipas tyre. “Për opozitën prona publike është njësoj e shenjtë si ajo private. Me privatizimin e ARMO-s kemi pasur më shumë evazion fiskal, ndotje të mjedisit. Evazioni që është bërë me naftën virgin është në sytë e të gjithëve. Privatizimi i CEZ ka sjellë përkeqësim të gjendjes financiare të KESH-it”, – deklaroi nënkryetarja e Komisionit të Ekonomisë, Mimi Kodheli. Më pas, ajo vijoi duke theksuar se projektligji që paraqitej nga qeveria nuk parashikonte trajtimin e punonjësve që do të dilnin nga puna në momentin kur do të bëhej privatizimi. Ministri i Ekonomisë, Nasip Naço deklaroi të kundërtën duke theksuar se punonjësit që mund të preken nga ky privatizim do të mund të përfitojnë pagën e plotë të një viti.

Deputeti Arben Ahmetaj nga ana tjetër i bëri thirrje qeverisë që të tërhiqej nga privatizimi për shkak të vlerës së madhe që ka ky aset. “Bëhet fjalë për një aset që mund të vlejë miliarda dollarë, dhe nafta e gazi mund të rivlerësohen në miliarda dollarë. Nuk duam që Albpetrol-i të privatizohet 100 për qind, pasi nuk është koha e duhur. Investitorët strategjik provohen gradualisht, sepse bëhet fjalë për një aset që mund të vlejë miliarda dollarë”,- tha Ahmetaj.

Për herë të parë qeveria merr përsipër të shesë të gjithë aksionet e saj tek sektorët strategjik, ndërkohë që deri më tani, në privatizimet e sektorëve me peshë ka mbajtur një pjesë të tyre. Përllogaritet që “Albpetrol” të vlejë rreth 400 milionë dollarë, ndërkohë që deputetët e majtë hodhën dje dyshime edhe mbi kompaninë që ka bërë vlerësimin, “Patton Bog’s”, e cila njëkohësisht bën lobing për qeverinë shqiptar në SHBA. E njëjta kompani ka bërë edhe konsulencën kur u shit ARMO, duke përfituar 4 milionë dollarë. Kompania në fjalë pritet të marrë 2.5 për qind të vlerës në momentin kur të shitet “Albpetrol”.

Kompania ka aktualisht të punësuar mbi 4 000 punonjës, një pjesë e të cilëve rrezikojnë të mbeten pa punë pas privatizimit. Pushimet masive nga puna janë një fenomen që haset në çdo privatizim. Në lidhje me këtë, specialist të METE-s, deklaruan pak ditë më parë në Komisionin e Ligjeve në Kuvend se numri i punonjësve që mund të preken nga reforma vërtitet në rreth 2 500.