Ministrat Mjaft kohe eshte humbur. Shqiperia ka nevoje per nje pakt politik

Publikuar me : 12.09.2011 Ne : Politike - 72 Lexime. Origjina : Gazeta Shekulli

 

Mjaft kohë është humbur, Shqipëria ka nevojë për një pakt politik, pasi vetëm kështu do të ketë shansin të bëhet së shpejti anëtare e Bashkimit Europian. Ky është mesazhi që i është përcjellë klasës politike shqiptare nga ministrat e Jashtëm të Greqisë dhe Italisë, në përfundim të vizitës në Tiranë.

 Në mbyllje të takimeve me krerët e shtetit dhe liderin e opozitës, ministri i Jashtëm grek u shpreh se vizita e tij dhe homologut italian në Shqipëri vjen në një çast kritik për integrimin e vendit në BE.

“Procesi është pa dyshim i vëshirë. Ka nevojë për përgatitje dhe bashkëpunim nga të dyja palët për ndërtimin e një konsensusi politik. Ne ju garantojmë se do të jemi në anën tuaj dhe do t’u mbështesim në përpjekjet tuaja për të arritur ëndrrën tuaj dhe ëndrrën tonë”, tha ministri i Jashtëm grek, Stavros Lambrinidis.

Ndërsa kryediplomati italian, Franko Fratini, tha se mbetet i domosdoshëm bashkëpunimi mes forcave politike dhe funksionimi normal i Parlamentit. “Kemi lënë pas një vit të humbur. Ne duhet ta rifitojmë këtë kohë. Funksionimi normal i Parlamentit dhe bashkëpunimi qeveri-opozitë janë të domosdoshme për Shqipërinë. Ne kemi folur për angazhimin politik, por pa këtë dhe pa pasqyrimin e kësaj në veprime dhe jo fjalë, nuk do të ketë asgjë pozitive në raportin e ardhshëm për Shqipërinë”, tha Fratini.

“Ajo për të cilën Shqipëria ka nevojë është një pakt politik si në rastin e anëtarësimit në NATO. Ky pakt do të diktohet nga shqiptarët dhe jo nga ne. Në rast se ndodh kjo, Shqipëria ka shansin të bëhet së shpejti anëtare e Bashkimit Europian”, përfundoi Fratini.

G.N./ Redaksia online

 

* * *

 

Në fillim të vizitës së tyre në Shqipëri, ministrat e Jashtëm të Greqisë dhe Italisë, Stavros Lambrinidis dhe Franko Fratini, janë takuar me ministrin e Jashtëm, Edmond Haxhinasto. Dy shefat e diplomacisë së dy vendeve fqinje u shoqëruan nga ambasadori i BE në Tiranë, Etore Sequi.

Pas Ministrisë së Jashtme, dy ministrat i janë drejtuar Kryeministrisë, ku kanë zhvilluar një takim me kryeministrin Berisha. Më tej, ministrat janë takuar edhe me presidentin Topi, e më pas me liderin e opozitës, Edi Rama.