Mourinjo Dua te kthehem ne Angli

Publikuar me : 27.12.2011 Ne : Sport - 82 Lexime. Origjina : Gazeta Shekulli



Hoze Mourinjo ka ritheksuar dëshirën për t’u kthyer në Premier Ligë pas disa vitesh, kur të ketë marrë fund puna e tij te Reali i Madridit. Ish-trajneri i Çelsit gjithnjë e ka pohuar dashurinë e tij për futbollin anglez dhe ka vite që flitet si pasardhësi i Sër Aleks Fergusonit te Mançester Junajtid, kur skocezi të vendosë të dalë në pension.

Portugezi iu bashkua skuadrës së Realit me një kontratë katërvjeçare në verë të vitit 2010 dhe këtë sezon është në krye të renditjes së Primera Division me gjigantët madrilenë, me tri pikë më shumë se Barcelona. Por ai e ka përshkruar kthimin e tij të mundshëm në Premier Ligë si hapin e radhës. Mourinjo ka folur për mediat angleze dje dhe ka thënë: “Unë jam shumë shumë i lumtur te Reali i Madridit.

Është një përvojë e jashtëzakonshme për mua. Besoj se është ndoshta klubi më i madh në historinë e futbollit. Unë nuk dua të humb shansin të punoj këtu, por pasioni im është Anglia dhe hapi im i radhës është të kthehem atje, mundësisht të shkoj dhe të qëndroj shumë gjatë. Më bëni gati një klub pas disa vitesh, një klub të mirë.” Trajneri 48-vjeçar është i njohur si një studiues i lojës, por këmbëngul se “gjenialiteti individual” do të triumfojë në fund, pavarësisht përgatitjes dhe organizimit.

“Mendoj se gjenialiteti më në fund do të bëjë diferencën. Gjenialiteti në futboll ka të bëjë me disa futbollistë, të cilët mund të thyejnë çdo organizim dhe punë që ti bën me skuadrën tënde. Gjenialiteti ekziston edhe te trajnerët. Për mua në futboll gjëja më e rëndësishme është menaxhimi i njerëzve. Futbolli për mua është shkencë njerëzore, ka të bëjë me njeriun.” Mourinjo gjithashtu ka rënë dakord për prospektin e dështimit njerëzor si një nga pikat tërheqëse të futbollit, duke thënë:

“Inteligjenca emocionale është vendimtare në këtë nivel në çdo sport. Është diçka tjetër të shënosh një penallti kur je duke fituar 5-0 në miqësore dhe ndryshe të kesh një penallti në minutën e fundit të finales së Ligës së Kampionëve ose Kupës së Botës. Unë përpiqem t’i përgatis lojtarët e mi sa më mirë që mundem, por në fund të fundit janë ata që vendosin për gjithçka në momentin e duhur.

Ata bëjnë diferencën. Unë i analizoj ata në kontekstin e grupit, por e di se ata janë të gjithë unikë. Kjo është një përvojë magjepsëse – shumë prej nesh nuk duan të heqin dorë, kurrë. Ne duam të shkojmë deri në fund të sezonit si kryesues sepse kjo bëhet pjesë e jetës sonë.”