Nuk e zgjedhin kandidat per kreun e qarkut, largohet tek LSI kreu i PS Vlore

Publikuar me : 21.10.2011 Ne : Politike - 71 Lexime. Origjina : Gazeta Shekulli

 Moszgjedhja si kandidat për kreun e qarkut, është përcjellë me një reagim të menjëhershëm nga kreu i PS së rrethit Vlorë. Mbetur përfundimisht jashtë kësaj candidature, ai ka deklaruar kalimin e tij tek LSI-ja. Kujtim Sulçe, i cili prej më tepër se dy vitesh mbante pozicionin e kreut të kësaj partie për rrethin e Vlorës, tha se jepte dorëheqjen nga posti partiak, të cilën e ka shpjeguar me mungesën sipas tij të funksionimit të kryesisë së Partisë Socialiste.

Në deklaratat e tij para mediave, Sulçe ka drejtuar shigjetat direkt kundër kreut të partisë socialiste, pjesë e së cilës ka qenë deri tani, Edi Rama. Ndër arsyet që ai ka radhitur kanë qenë disa nga parimet e shkelura si disiplina e brendshme në parti dhe demokracia, liria e mendimit në parti, kolegjialiteti e transparenca. Sulçe tha se e merrte këtë vendim pasi kishte parë përfundimisht se nuk kishte më demokraci në partinë ku ai aderonte, ndërsa ka përligjur kalimin tek LSI si një parti e e majtë që mbron idealet e luftës antifashiste nacional-çlirimtare, një parti sipas tij që lufton për integrimin e Shqipërisë në BE, duke shprehur kështu vijimësinë e ambicieve të tij në politikë.

Pyetur nga mediat, nëse po të ishte ai emri i kandidaturës në qarkun e Vlorës, a do të kishte bërë publike këto mangësi në PS, Sulçe tha thjesht se kishte bërë edhe më parë prezente ankesat, por nuk dha një përgjigje direkte. Ai tha se nga ana e LSI-së i ishte propozuar të ishte kandidaturë për këtë pozicion, por nuk kishte pranuar.

“Nuk do të rri më të hap dhe mbyll derën e selisë në PS”, tha Sulçe duke pohuar se veç ofertës për të kaluar tek kjo parti, përfaqësuesit e saj i kanë bërë edhe oferta punësimi”. Burime nga PS e Vlorës pohojnë se gjatë këtyre ditëve mes Sulçes dhe strukturave ka patur mosmarrveshje pikërisht për kandidaturën e kreut të qarkut që do të propozohet nga ana e PS. Sulçe, zgjedhur anëtar i këshillit të qarkut, ka shfaqur ambicjen për të qenë ai në drejtimin e qarkut, por vendosja si kandidaturë e Bruna Mersinit, është përcjellë deri në largimin drejt një partie pjesë e koalicionit qeveritar.  / Anila Peçi