Partite e vogla, leter Kuvendit

Publikuar me : 25.12.2011 Ne : Politike - 57 Lexime. Origjina : Gazeta Shekulli

Partitë e vogla kanë zyrtarizuar kërkesën e tyre për ndryshim të sistemit zgjedhor. Përmes një letre, tri partitë e majta, konkretisht PSD,PDS e PSV i kanë dërguar Komisionit të Reformës Zgjedhore propozimet e përbashkëta për përmirësimin e sistemit zgjedhor dhe të Kodit Elektoral. Tre partitë e vogla të opozitës propozojnë ndryshimin e sistemit nga proporcional rajonal , në proporcional rajonal me korrigjim kombëtar.

Sipas tyre, formula  e zgjedhjes së anëtarëve të parlamentit të ri pas zgjedhjeve të 3013, duhet të jetë 100 plus 40. Kjo formulë sipas aleatëve të vegjël të Partisë Socialiste “risjell frymën pluraliste në përfaqësimin parlamentar, limiton monopolet politike , sjell në parametra objektivë përfaqësimin e votës popullore në mandate parlamentare dhe garanton moderacion anti-krizë në funksionimin e parlamentit”.

Kryetari i PSV, Petro Koçi, sqaroi se krahas propozimeve për sistemin, tri partitë kanë kërkuar edhe reforma në procesin e identifikimit të zgjedhësve nëpërmjet teknologjisë biometrike, në numërimin e votave nëpërmjet skanimit elektronik, në përbërjen  e administratës zgjedhore si edhe në çështje të tjera si financimi i subjekteve elektorale e pasqyrimi mediatik i fushatës zgjedhore të këtyre subjekteve. Partitë e vogla kanë akuzuar dy partitë e mëdha se i kanë përjashtuar nga diskutimi për Reformën zgjedhore.

Në mbledhjen e grupit të punës ku u miratua edhe axhenda, përfaqësuesit e dy partive aleate të PD, Tavo dhe Mediu braktisën mbledhjen në shenjë revolte. Ekspertët e PD dhe të PS shprehen se marrëveshja e bashkëpunimit për reformën elektorale nuk e përfshin ndryshimin e sistemit elektoral.  Për rrjedhojë sipas tyre axhenda do të fokusohet vetëm në sugjerimet e raportit final të OSBE/ODIHR-it. Data 20 dhjetor u caktua nga grupi I punës për të dëgjuar propozimet e partive joparlamentare që kanë marrë 1 perqind të votave në lokalet e 2011-s. Po ashtu, brenda kësaj date do të realizohen konsultat me KQZ-në, Ministrinë e Brendshme dhe OJF-të që monitorojnë zgjedhjet.

Axhenda
1.    Regjistrimi i subjekteve e kandidatëve – (dhjetor 2011)
2.    Fushata zgjedhore – (dhjetor 2011)
3.    Media në fushatën zgjedhore – (dhjetor 2011)
4.    Financimi i zgjedhjeve – (dhjetor 2011)
5.    Regjistrimi i zgjedhësve – (janar – mars 2012)
6.    Procedurat e votimit – (janar – mars 2012)
7.    Numërimi i votave – (janar – mars 2012)
8.    Nxjerra dhe shpallja e rezultatit – (janar – mars 2012)
9.    Administrata zgjedhore – (janar – mars 2012)
10.    Procesi i ankimit – (janar – mars 2012)