Perseri 3G, pse nderroi mendje qeveria?

Publikuar me : 02.07.2011 Ne : Ekonomi dhe Biznes - 197 Lexime. Origjina : Gazeta Shekulli



Emirjon Senja

TIRANË- Kur nuk ka mbushur ende një vit nga dhënia e licencës së vetme të shërbimit të internetit 3G në vend, qeveria ka vendosur sëfundmi të lëshojë edhe një të dytë. Nisma kishte kohë që përflitej ndër kompanitë celulare, ndërkohë që vetëm pak ditë më parë, qeveria ka hedhur hapa konkret duke rihapur garën për licencën e dytë të shërbimit 3G në Shqipëri. Tenderi do të organizohet nga AKEP dhe pritet të fillojë me një çmim minimal prej 12.5 milionë euro, ashtu siç u veprua edhe gjatë dhënies së licencës së parë, e cila u fitua kundrejt çmimit prej 31.4 milionë euro.

Dhënia e vetëm një licencë për këtë shërbim krijoi monopol ne tregun e shërbimit 3G duke shkaktuar kështu reagimin e shoqërisë civile, Autoritetit të Konkurrencës si edhe kompanive celulare, të cilat me ngulm kërkuan liberalizimin e plotë të tij duke lëshuar jo vetëm një licencë, por katër, nga një për secilën. Madje, pati prej atyre kompanive, të cilat ose ofruan shuma minimale në tenderin e zhvilluar gjatë vitit të shkuar ose nuk morën pjesë fare.

Tashmë, rreth 10 muaj pas zhvillimit të këtij tenderi, jemi përsëri përballë vendimit për lëshimin e një tjetër licence. Pyetjet që mund të bëjë çdokush kanë të bëjnë me faktin se çfarë ndryshoi beftas në treg në këto muaj për të bërë qeverinë të ndërmarrë një hap të tillë, pse të mos t’i jepet licencë secilës kompani por ato limitohen, fillimisht në vetëm një dhe tashmë në dy, pse tenderi fillon nga 12.5 milionë euro ashtu si edhe në licencën e parë dhe sa interes kanë kompanitë për të marrë pjesë në këtë tender, dhe më e rëndësishmja, si përfiton konsumatori nga zhvillime të tilla? -Përgjigja zyrtare nga Ministria e Inovacionit është se vendi ynë është duke ndjekur të njëjtën praktikë si shtetet e tjera. Fakt është, se që prej periudhës kur shpalli tenderin për vetëm një licencë 3G në tregun shqiptar, qeveria u përball me presionin e Komisionit Evropian dhe të kompanive për liberalizimin e këtij tregu. “Dhënia e licencave 3G është një proces hapash suksesive, që vijon në kohë, siç dëfton edhe përvoja e vendeve të tjera që kanë aplikuar më herët teknologjinë 3G”- thekson Ministria e Inovacionit në njoftimin e saj zyrtar për hapjen e garës. Në fakt, lajmi për dhënien e një tjetër licence 3G ishte dhënë fillimisht nga kreu i AKEP-it, Piro Xhixho gjatë raportimit në Kuvend në muajin mars, por kompanitë ishin vënë në dijeni shumë më përpara për zhvillimet që do të ndodhnin.

Nga këto zhvillime, përfitimet e konsumatorëve janë relative. Nga njëra anë, gara midis kompanive dhe ofertat bëjnë që të ketë ulje çmimesh por rritja e kostos duke shitur shtrenjtë licencat rrezikon që barra për përballimin e shpenzimeve t’iu transferohet atyre. Që prej futjes së shërbimit të bartjes së numrit, kompanitë janë duke zhvilluar një “luftë” me njëra tjetrën për të ftuar të pakënaqurit e kundërshtarit, mbetet për t’u parë nëse e njëjta gjë do të ndodhë edhe në garën për 3G. Tani nuk jemi në kushtet e tenderit të parë, në tregun e 3G ndodhet një operator, ndërsa çmimi fillestar i tenderit është po ai.