Publikuar me : 11.11.2011 Ne :
Kuriozitete - 63 Lexime. Origjina : Gazeta Shekulli
Agjencia “Ama News”
Është kuptuar me kohë se qeveria që na drejton është klienteliste dhe deri në ekstremin e mafies. Ministra, politikanë, kryeministër dhe familjarë të kapur keq në afera, korrupsion, ligje mafioze dhe dashakeqës për qytetarë të majtë dhe të djathtë. I fundit, ligji i plehrave. Berisha tha se ishte ligj evropian, kusht i BE-së, në të mirë të integrimit dhe të ardhmes.
Jozefina Topalli bëri thirrje se duke votuar ligjin deputetët opozitarë i shërbenin të ardhmes së fëmijëve të tyre, pasi na çonte në integrim. Fatmir Mediu, ministri Mjedisit, bëri be e rrufe në parlament e televizione se ishte një ligj brenda standardeve, modern dhe i adaptuar nga Bashkimi Evropian. Ministrja e Integrimit, Majlinda Bregu, na hodhi “karrotën” duke thënë se opozita po pengonte integrimin duke kundërshtuar politikisht ligjin e importit të integruar të plehrave. Dhe për ta bërë më të besueshme, vrokthi diku nga Bushati i Shkodrës na shfaqet qoftexhiu dhe birraxhiu i OSBE-së, “mostra” diplomat më i shëmtuar që ka pasur vendi ynë ndonjëherë. “Ligji është demokratik dhe garanton të gjitha kushtet integruese”, do të shprehej ai në landfillin bosh të plehrave i ndërtuar posaçërisht për plehrat toksike që do të vijnë. Të gjithë na mashtruan sy për sy dhe e kaluan atë ligj mes ovacionesh e duartrokitjesh se kishin mposhtur opozitën dhe dekretin e Presidentit Bamir Topi. Por ja se ku dolën.
Të gjithë mashtrues, me certifikatën e BE-së. Bashkimi Evropian, i vënë në dijeni për deklaratat e këtyre zyrtarëve të lartë dhe diplomatit, doli sot menjëherë në deklaratë sqaruese nëpërmjet komisionarit të posaçëm në Bruksel. “Nuk i kemi kërkuar qeverisë ligjin e importit të plehrave. Nuk është detyrim i vendosur nga ne dhe shpjegimet duhet t’i japë qeveria”, – tha ndër të tjera Brukseli për këtë situatë. Por Berisha sot ka ikur në Maqedoni, nuk mund të reagojë. Majlinda kushedi ku do të jetë fshehur. Volfarth foli për programin e padenjë të PS-së që kërkon të vijë në pushtet dhe i heq atij “pjatën me qofte” e bidonin e birrës. Mediut thuhet se i ka ikur zëri përsëri dhe ka nevojë për ndërhyrje kirurgjikale, kurse Topalli ka një çikë punë pashukiane dhe ashtë e xanun. Atëherë kush do të dalë t’i shpjegojë qytetarëve shqiptarë se cili do ta mbajë përgjegjësinë për mashtrimin e madh me plehrat…?! Kjo klasë politike që na drejton, është më e shëmtuara e të gjitha kohërave që ka njohur vendi. Më mafiozja dhe më dashakeqësja për të ardhmen e vetë shqiptarëve. Mund ta cilësojmë me plotë gojë si armiku më i madh i shëndetit dhe fëmijëve tanë. Tani të presim reagimin e opozitës shqiptare, nëse edhe këta nuk i ka zënë gjumi dhe bëjnë sikur nuk dëgjojnë. Sot duhet të flasin për mashtrimin e madh të atyre njerëzve që përmendëm më sipër…
