Prifti i kunderpergjigjet Metes Shqiptaret presin drejtesi dhe ajo s’do vonoje

Publikuar me : 09.01.2012 Ne : Politike - 30 Lexime. Origjina : Gazeta Shekulli

Dritan Prifti i është kundërpërgjigjur Ilir Metës, i cili e sulmoi atë nga Shkodra. Prifti ka cilësuar deklaratën e Metës si një tentativë për optimizëm por sipas tij drejtësia do të vendoset në vend. Ish-ministri i Ekonomisë tha se kreu i LSI-së është një kondor e dëmshme.

“Ilir Meta dje me eufori e quajti veten luan dhe mua një mi. Nuk besoj se ka shqiptar që nuk e di kush është luani dhe kush miu në rastin tonë. Ai kërkoi më kot t’i japë optimizëm një familjeje politike të korruptuar dhe të lodhur nga pesha e fajit që ka para shqiptarëve. Ndonjë që nuk e njeh edhe mund të mashtrohet që ai është një luan, por unë e njoh. Në sytë e mi ai është një tartabiq i fryrë me gjak, që rrezikon ta shtypë po ajo mullaqe që i dha gjakun. Kush ka frike nga një tartabiq?

Luan ishte Ilir Meta në vitin 2001 kur kishte miq e shokë. Sot atij nuk i ka mbetur asnjë mik e asnjë shok sepse të gjithë i tradhëtoi, i përdori dhe i mashtroi. I vetmi që i rri pranë është xha Braho, prokurori që ka varur në litar, njerëz të pafajshëm.

Xha Braho ka blerë një Benz të ri që kur ka filluar gjyqi i Ilir Metës. Mund që Benza të blejën dhe disa gjyqtarë nga kjo histori, por është e sigurtë që Metën sot e shohin me përbuzje e neveri të gjithë. Dikush mendon ti marrë disa euro më shumë tani që është në hall kurse të tjerët, shumica e shqiptarëve, presin drejtësi. Dhe drejtësi do të ketë”, thuhet në reagimin e Priftit.

Me 14 janar gjykata pritet të japë vendimin për gjyqin ndaj Ilir Metës. Kreu i LSI-së akuzohet për korrupsion aktiv dhe prokuroria ka kërkuar ndaj tij një dënim me dy vite burg dhe një gjobë prej 1 milion lek.