TIRANË- Në periferi të kryeqytetit, një çift i sapo martuar ndahet për shkak se nusja nuk ishte e virgjër. Por, prishja e kësaj martese ka sjell tensione mes familjes Marku nga Mirëdita dhe familjes Miftaraj nga Kukësi, që banojnë në Bathore.

Ka qenë familja Marku, e cila me të marr vesh arsyen e divorcit të vajzës së tyre me inicialet R.M., kanë kërkuar nga kjo e fundit të tregoj emrin e personit që i kishte marr nderin. Nga frika, vajza kishte treguar se personi që dashuronte dhe me të cilin kishte pas edhe lidhje intime është emigranti Glisenko Miftaraj me origjinë nga Kukësi por me banim në Bathore. Me të marr vesh emrin, familja e N.Markut është drejtuar në banesën e familjes Miftaraj, ku kanë takuar shtetasin Ylli Miftaraj, vëllai i Glisenkos.

Gjatë këtij takimi, sipas kallëzimit në polici, “burrat” e familjes Marku ka kanë kërcënuar Ylli Miftarajn, që nëse nuk vjen i vëllai i tij të marr vajzën, ata do të hakmerreshin duke e vrarë atë, pasi Glisenko e kishte turpëruar familjen e tyre. Ky kërcënim, fillimisht nuk është marr seriozisht nga Ylli Miftaraj, duke neglizhuar debatin e bërë me pjesëtar të familjes Marku në hyrje të banesës së tyre. Por, me datë  23 Gusht 2011 aty rreth mesnatës, në kohën që Ylli Miftaraj po kthehej në banesën e tij, i kanë dal para dy persona të cilët e kanë kërcënuar me armë.

“Duke shkuar në shtëpinë time rreth orës 01:00 të datës 23 gusht 2011, dy persona më ndaluan dhe më kërkuan adresën e vëllait tim, Glisenko Miftaraj. Unë iu përgjigja që vëllai nuk ndodhet në Shqipëri, ndërsa ata më thanë se po nuk erdhi vëllai ne do të vrasim ty”-thuhet në kallëzimin që “Shekulli” ka siguruar një kopje. Sipas denoncimit, dy djemtë kishin dialekt verior dhe ishin të moshës nga 25 deri 35 vjeç. Sipas policisë për këtë kërcënim, ka djeni edhe xhaxhai i Ylli Miftarajt, i cili është marr në pyetje nga policia e Komisariatit nr.5.

Gjithashtu, sipas këtyre të dhënave, Miftaraj është kërcënuar sërish më datë 8 Shtator 2011 tek vendi i quajtur “Ura e Paskuqanit”, ku dyshohet se kanë qenë të njëjtët persona. Sipas kallëzimit, shtetasi Glisenko Miftaraj kishte një lidhje dashurie me vajzën R.M. e cila kishte frikë t’i tregonte prindërve për lidhjen, pasi familja Miftaraj ishin të besimit mysliman. Çka ishte e sigurt, që ajo nuk do lejohej të martohej me atë që dashuronte për shkak të fesë. Edhe pse ajo dashuronte kuksianin, kishte pranuar të martohej me një person tjetër nga Mirëdita, i cili e ndau të nesërmen e martesës pasi nuk ishte e virgjër.