Prizren, vazhdon gjyqi ndaj deputetes Vokshi

Publikuar me : 03.07.2011 Ne : Politike - 191 Lexime. Origjina : Gazeta Shekulli

Dosja “Vokshi” vazhdon të jetë është në shqyrtim nga Gjykata e Prizrenit për Kundërvajtje. Kjo gjykatë ende nuk ka caktuar datën e gjykimit. Këtë fakt e konfirmoi në një prononcim për gazetën “Shekulli”, kryetari i Gjykatës në Prizren Alija Fazlli.

Më 14 nëntor të vitit të shkuar, Gjykata për Kundërvajtje në Prizren dënoi me 250 euro gjobë deputeten e Parlamentit të Shqipërisë Albana Vokshi. Kjo gjobë u vendosë pas denoncimit të policisë kufitare të Vermicës.

Vokshi është akuzuar për fyerje për shkak të detyrës. Me ndërhyrjen e Kryeministrit të Kosovës, Hashim Thaçit dhe atij të Shqipërisë, Sali Berisha, Gjykata e Lartë për Kundërvajtje në Prishtinë e ktheu çështjen për rishqyrtim.

“E vetmja detyre e lënë nga Gjykata e Lartë për Kundërvajtje është që të verifikohen të drejtat e personave, që kanë pasaportë diplomatike. I jemi drejtuar ministrisë së Punëve të Brendshme dhe të Jashtme të Kosovës për të na përcaktuar të drejtat e deputetëve me pasaportë diplomatike, por asnjëra nga ministritë nuk është përgjigjur”, tha Fazlli.

Ai theksoi se në bazë të ligjit gjykata do t`i drejtohet dhe një herë këtyre institucioneve dhe në mungesë të një përgjigjie do të procedojë pa qenë nevoja e një sqarimi.