Programi i ri i PS-se, Rama Fitorja jone, bazuar ne strategjine per rimekembjen e ekonomise

Publikuar me : 01.11.2011 Ne : Politike - 61 Lexime. Origjina : Gazeta Shekulli



Kryesocialisti Rama ka paraqitur sot në Asamblenë Kombëtare programin e hartuar nga ekspertët, me të cilin e majta synon të shkojë drejt fitores në zgjedhjet e ardhshme.

Programi i ndarë në katër pjesë nis me strategjinë për rimëkëmbjen e ekonomisë së vendit. Socialistët i qëndrojnë besnikë strategjisë së propozuar prej disa javësh për heqjen e TVSH-së së ushqimeve bazë.

Kjo nënkupton se zerimi i TVSH-së për produktet bazë synon të çmontojë monopolet e krijuara në treg dhe nuk dëmton prodhuesit vendas, pasi pjesa më e madhe e këtyre produkteve vijnë nga importi (sheqeri, orizi, 2/3 e sasisë së miellit etj).

Duke ngelur përsëri tek bujqësia, programi i socialistëve propozon një politikë të re fiskale në mënyrë që të ulen kostot e prodhimit bujqësor. Krijimi i një rrjeti kombëtar tregtimi për produktet bujqësore dhe shumëfishimi i financimit publik ndaj fshatit janë pikat e tjera ku fokusohet programi i ri, i cili në këtë mënyrë synon të fitojë elektorat atje ku e majta ka rezultuar më e dobët gjatë zgjedhjeve të kaluara: zonat rurale.

“Strategjia e PS-së për të nxjerrë vendin nga kriza që po thellohet dita-ditës, synon të bëjë të dobishëm shfrytëzimin e burimeve natyrore përmes anulimit të koncesioneve të paligjshme dhe procedurave transparente të konkurrimit. Ka të bëjë me angazhimin tonë se do hapim 300 mijë vende pune brenda mandatit të parë qeverisës. Duhet të përmbyset sistemi i vjetër i asistencës për të papunët dhe të ndërtohet një program i ri integrimi në punë. Do të garantohet paga minimale mbi minimumin jetik duke siguruar të paktën hapjen e 75 mijë vende pune në vit”, u shpreh Rama.

Një tjetër pikë e programit të ri të socialistëve është edhe çështja e pronave, e cila prej 20 vjetësh ka mbetur e pazgjidhur. “Duhet të heqim termin “ish-pronarë”. Nuk ka ish-pronarë, por pronarë realë. Ne do ta zgjidhim çështjen e pronave dhe do të nisim bashkëpunimin me pronarët”, tha Rama.

* * *

Sot Partia Socialiste mblodhi Asamblenë Kombëtare, në të cilën do të miratohet programi i ri politik dhe reforma organizative e partisë. Për programin dhe reformimin e PS-së, ashtu siç është bërë e ditur, kanë punuar dy grupe pune.

Në Asamblenë e sotshme pritet që të miratohen draftet si dhe do të zgjidhet kryesia dhe sekretariati i PS-së, me të cilët kreu i opozitës do të punojë për të fituar zgjedhjet e ardhshme. Ndërkohë që sot mendohet se do të diskutohet dhe për propozimin e Arben Malajt për modernizimin e PS-së, propozim ky që është prezantuar nga vetë Malaj në takimet me elektoratin në disa qytete të vendit.