Programi politik i PS-se, Rama Ta bejme Shqiperine vendin qe meritojme

Publikuar me : 21.12.2011 Ne : Politike - 34 Lexime. Origjina : Gazeta Shekulli

 

Partia Socialiste në një mbledhje të 21 grupeve të punës për hartimin e programit të ri politik të saj, ka prezantuar synimet kryesore të programit. Në fjalën e tij, kreu i PS-së Edi Rama theksoi se ky program synon ta bëjë Shqipërinë vendin që shqiptarët meritojnë.

“Kemi ngritur 21 grupe të asamblesë kombëtare për detajimin e programit të ri. Duhet të hapemi përtej vetes, përtej Partisë Socialiste, përtej opozitës për shtjellimin e programit”, u shpreh kreu i opozitës.

Më tej Rama u ndal tek të gjitha çështjet e mprehta të realitetit të Shqipërisë që sipas tij kanë nevojë për ndryshim rrënjësor. Si dy çështje kyçe Rama përmendi shërbimin shëndetësore dhe problemin e pronave.

“Shërbimi shëndetësor që ka sot Shqipëria është një realitet që e turpëron sot politikën. Qeveria e ka shpënë në fundin e pusit të qelbur të korrupsionit”, Rama.

“Në ekrane flet për të drejtën e pronës ndërsa në zyra e hipoteke i shkel këto të drejta. Grupi i punës duhet të gjej një kanal të gjerë komunikimi me pronarët. Do të vendosim në vend institucionin e pronës”, shtoi ai.

Lidhur me infrastrukturën Rama tha se qeveria ka çuan në këtë drejtim pjesën më të madhe të taksave por rezultatet nuk janë ato që duhet të ishin. Ai u shpreh se po ndërtohen rrugë jashtë standardeve.

“Infrastruktura është zëri që ka marrë më shumë investime. Rrugët nuk janë të standardeve perëndimore përveç segmentit të rrugës së kombit – të tjerat janë të botës së tretë”, tha kreu i PS-së.

Më tej Rama foli dhe për taksën progresive – ku sqaroi se me këtë taksë do të rregullohet sistemi i shpërndarjes të të ardhurave. “Sa më i pasur aq më shumë duhet të paguash dhe sa më i varfër të jesh aq më shumë duhet të ndihmosh për një ndarje sa më të pa barabartë”.

Pjesë e programit tha Rama do të jetë edhe krijimi i kushteve për autonomi të pushteti vendor, media të pavarura dhe përmirësimi i shërbimit diplomatik.

Kreu i PS-së bëri të ditur se hartimi i programit do të bëhet në dy fazë. Në fazën e parë, 21 grupet e punës – të cilat u përcaktuan në mbledhjen e Asamblesë Kombëtare – do të hartojnë nga një raport. Ndërsa në fazën e dytë parashikohet harmonizimi i këtyre raporteve në një të vetëm.

 

Redaksia OnLine

Florenc Stafa