Rama Kryeprokurorja, ne shenjester nga PD

Publikuar me : 02.02.2012 Ne : Politike - 88 Lexime. Origjina : Gazeta Shekulli

“Problematikat në drejtësi janë ende të mëdha sikundër prokurorja është vënë në shenjestër për të penguar zbardhjen e 21 janarit”. Ishte kjo deklarata e dhënë nga Kryetari i Partisë Socialiste Edi Rama, në tryezën e grupit të punës për drejtësinë. Rama nuk anashkalon dhe marrjen e statusit të vendit kandidat për në BE, duke e interpretuar me nota ironie ngjarjen e 21 janarit dhe zbardhjen e saj.

Për të, Bashkimi Europian nuk pranon në gjirin e saj Shqipërinë, kjo jo pa një motiv të vetëm.

“Si është e mundur që Bashkimi Europian të pranojë në gjirin e vet një vend ku pushteti ekzekutiv sulmon në një mënyrë të tillë Prokurorinë e ku Prokurorja e Përgjithshme kthehet në shënjestër për të penguar me doemos zërin e të vërtetës për një ngjarje tragjike.

Si është e mundur që bëhet çmos për tu devijuar rruga drejt të vërtetës. Është e pamundur të pretendojmë se BE mund ta pranojë Shqipërinë në gjirin e vet teksa barazia para ligjit dhe vetë funksionimi i vetë drejtësisë në Shqipëri përbën një nga problemet më të rënda për vendin dhe shoqërisë. Nga ana tjetër, vetë BE nuk mund të pranojë në gjirin e saj një vend që nuk e zgjidh dot të vërtetën për sistemin e drejtësisë, por edhe qytetarët nuk mund të ndërtojnë një të ardhme teksa janë të kërcënuar përditë nga drejtësia që lidhen me kërcënimet e pushtetit, apo pushtetin e parasë”, u shpreh Rama.

Për kreun opozitar është qeveria e cila pengon hetimin dhe bën çmos për të penguar rrugën drejtë së vërtetës.

“Teksa ne flasim, shoqëria jonë përballet me një sfidë që është sfida e të vërtetës së 21 janarit dhe e ndëshkimit të atyre që vranë dhe atyre që urdhëruan vrasjet. Është një përballje e cila nuk lidhet thjesht me faktin e një procesi hetimor e gjyqësor, por me faktin e shtetit të së drejtës së Shqipërisë për vite të tëra, që do të tregojë nëse gjithë atij zinxhiri padrejtësish e provash për të cilat Shqipëria ka krijuar bindje se pandëshkueshmëria ka krijuar bazë.  Sfida është se cila do jetë e nesërmja. 21 janari do shërbejë si një kapak i rëndë për tu lëvizur nga vendi mbi gjithë sistemin e drejtësisë nëse drejtësia nuk vihet në vend dhe si një gur i rëndë mbi vendosjen e një sistemi padrejtësie në themelet e funksionimit të gjërave në Shqipëri, pasi padrejtësia është shtrirë kudo sepse i ka rrënjët në mënyrën se si qeveriset ky vend. Unë besoj se është e vështirë të gjendet drejtësi në dyert e gjykatave kur vendi qeveriset nga një Qeveri padrejtësish, ku ata që qeverisin ndjekin interesat e tyre krejt të ndara nga interesat e vendit”, tha më tej ai.