Rama Platforma jone do te na coje drejt fitores

Publikuar me : 31.10.2011 Ne : Politike - 52 Lexime. Origjina : Gazeta Shekulli

Dy draftet që do të paraqiten në Kongresin e 5 nëntorit do të jenë instrumentet me të cilat Partia Socialiste do të fitojë zgjedhjet e ardhshme. Kreu i opozitës është shprehur në mbledhjen e grupit parlamentar të Partisë Socialiste se propozimet e saj kanë ngjallur interes tek qytetarët.

“Programi është i mbushur me vizion, ide dhe alternativa konkrete. Me të kemi risi organizative, mundësi për të hapur PS-në si një parti të çdo shqiptari që do të bëhet pjesë e ndryshimit të domosdoshëm. Propozimi ynë për heqjen e taksës që qeveria u merr qytetarëtve për bukën, qumështin, vezën dhe ilaçet për uljen në 6 perqind të taksës për çdo faturë dritash dhe taksës për imputet bujqësore kanë ngjallur interes. Me këto masa radikale të domosdoshme, ulja e kostos së jetesës së familjes së zakonshme do të jetë shumë e ndjeshme, ne do e bëjmë realitet sa të vijmë në qeveri”, tha Rama.

Rama ripërsëriti edhe një herë se plani i strategjia e socialistëve që synon reduktimin e TVSH nuk do të përfshijë prodhimet e fermërëve shqiptarë, siç gënjen Saliu.

“Këto janë masa që u shërbejnë njerëzve të zakonshëm që paguajnë taksë 20 perqind për çdo kafshatë bukë, gllënjkë qumësht apo një kokërr vezë. Ne do i heqim, e bashkë me to dhe taksën e imputeve bujqësore. Ne nuk do e prekim TVSH-në e prodhimeve të fushës si gënjen Saliu, pasi do i mbrojmë këto prodhime”, ka shtuar më tej Rama.

Duke e cilësuar të pajustifikueshme dhe brutale mungesën e maxhorancës në tryezën e përbashkët për drejtësinë, të organizuar të premten e kaluar, Rama u shpreh se PS do të vazhdojë të mbajë të shtrirë dorën e bashkëpunimit.

“Deputetët e Partisë Demokratike dhanë një mesazh të shëmtuar. Megjithatë ne do të vazhdojmë politikën e dorës së shtrirë. Ne jemi forca e të ardhmes”, tha Rama.