Rraklli Köstnerin eshte i duhuri per Shqiperine

Publikuar me : 11.11.2011 Ne : Sport - 50 Lexime. Origjina : Gazeta Shekulli

Nëse ka një person në Shqipëri që e njeh më mirë se kushdo tjetër Lorenz Günter Köstnerin, ai është Altin Rraklli. Ish-sulmuesi kuqezi, i cili ka qenë për disa sezone radhazi nën urdhrat e këtij trajneri tek Unterhaching në Bunsdesligë, thotë se Köstner është trajneri i duhur për Shqipërinë, por mohon që të ketë “sponsorizuar” për arritjen e kësaj marrëveshjeje.

- Altin, ju jeni ndërmjetës në marrëveshjen e Dukës me trajnerin gjerman Köstner?

- Kush e tha këtë? Sot kam lexuar në shtypin sportiv që unë kam ndërmjetësuar për të arritur marrëveshjen, por kjo s’është e vërtetë. E kam shumë mik këtë trajner, por nuk e kam sjellë unë në Shqipëri.

- Kjo do të ishte, përderisa ju e njihni personalisht, pasi ka qenë trajneri juaj…?

- Köstner ka qenë pranë marrëveshjes me FSHF-në disa vite më parë, kur u zgjodh Ari Han. Pra, është një njohje e vjetër e Dukës, i cili, me sa duket, ka hyrë përsëri në bisedime dhe palët kanë rënë dakord.

- Ju thoni që e keni mik dhe e njihni mirë. Si është si trajner?

- Shumë i mirë. Madje mund të them që është trajneri më i mirë qëm ka pasur gjatë karrierës sime në Gjermani. E mori skuadrën Unterhaching në një moment shumë të vështirë, mblodhi lojtarë që nuk po luanin te skuadrat e tyre dhe pati shumë sukses.

- Cila është cilësia që e dallon nga të tjerët?

- Është trajner shumë korrekt dhe i disiplinuar. Pikërisht këtë kërkon edhe nga futbollistët, disiplinë dhe korrektësi.

- Vetëm kaq? Po nga ana teknike?

- I jashtëzakonshëm për situatat e vështira. Mund t’ju përmend vetëm një detaj: e mori Volfsburgun para disa sezonesh në një moment shumë të vështirë, teksa ishte në zonën e rënies nga kategoria, por në fund të sezonit kjo skuadër për pak mori pjesë në Kupat e Europës. Pësoi vetëm një humbje në ndeshjen e parë e më pas mori 8 fitore radhazi. Përveç këtij momenti, kujtoj se në vitin 2000 Unterhaching i ka hequr titullin Bajernit të Leverkusenit në ndeshjen e fundit, duke fituar në transfertë.

- Besoni se do të ketë sukses në krye të Shqipërisë?

- Siç e thashë, është trajner që di ta nxjerrë skuadrën nga situata. Shqipëria është në një moment të vështirë, por ai ka nuhatje të jashtëzakonshme për të gjetur lojtarët e duhur. Pastaj, siç e thashë më lart, kërkon korrektësi dhe disiplinë. Këto i duhen një skuadre kombëtare si Shqipëria.