Rubio Tiranes i duhet zgjidhje e shpejte!

Publikuar me : 09.01.2012 Ne : Sport - 54 Lexime. Origjina : Gazeta Shekulli

Xhek Preçetaj

Trajneri i Tiranës, Hulian Rubio, për herë të parë për këtë vit flet për situatën në skuadër dhe lojtarët që ai do të  ketë në ekip si përforcime. Rubio e thotë hapur se, në qoftë se do të ruhet grupi, i duhet vetëm një sulmues, ndryshe do t’i bëjë gjërat nga e para. “Me siguri që do të ketë edhe afrime të tjera, përveç Gjatës dhe Sejdos. Unë do ta kërkoj një gjë të tillë, megjithatë varet edhe nga ekonomia. Personalisht dua që të paguhen këta që janë në radhë të parë sesa të kesh shumë lojtarë dhe askush të mos marrë lekë. E ardhmja asnjëherë s’është e parashikueshme. Deri më tani ka ardhur Gjata, të cilin e ndoqa në gjysmën e parë të sezonit dhe ua parashtrova drejtuesve të klubit si kërkesë për ta sjellë këtu. Kjo m’u realizua. Tashmë pres edhe një sulmues që më duhet patjetër. Kështu punohet në klubet profesioniste, jepen disa emra dhe në skuadër vijnë ata lojtarë që do trajneri. Kam dëgjuar që edhe Ilion Lika ka oferta, por mua nuk do të më vijë mirë që ai të largohet ashtu si për lojtarët e tjerë. Në qoftë se Tirana humbet Likën, është njësoj sikur Realit të Madridit t’i ikë Kristiano Ronaldo.”

“Kam folur gjithnjë me drejtuesit e klubit para fundvitit dhe sërish do të ulem dhe do të bisedoj në të mirë të skuadrës. Do të flas se si do të rrjedhin ngjarjet, për merkaton dhe për çështjet financiare për t’i dhënë një zgjidhje të shpejtë.”

Lidhur me largimet, “e di që shumë nga lojtarët kanë oferta. Madje një prej tyre është edhe Ahmataj. Unë u kam kërkuar që të zgjedhin sa më shpejt për të ardhmen e tyre. Nuk dua që të pengoj askënd. Por unë jam i mendimit që askush nuk mund të bëjë çfarë të dojë në çdo moment, sepse nuk më duket normale në fund të fundit. Por i takon klubit që të vendosë. Në qoftë se ka kontratë, është e drejta e klubit që ta shesë apo ta ndërrojë. E di klubi si të veprojë, sepse ka politikat e veta. Secili ka drejtat e veta, por pa thyer edhe detyrimet që mund të ketë”, theksoi gjatë prononcimit të dhënë dje trajneri spanjoll Hulian Rubio.